Ǵylym jáne joǵary bilim mınıstri Saıasat Nurbek el ýnıversıtetterinde engiziletin jańa mamandyqtar jaıynda aıtty, dep habarlaıdy Almaty-akshamy.kz.
«Aqtóbede úsh bakalavrıat baǵdarlamasy engiziledi: geoınjenerıa, kompúterlik ǵylym jáne elektroınjenerler de daıyndaı bastaımyz. Onyń bári de - jergilikti komanıalar CNPC, «Qazhrom», «Aqtóberentgen» mekemeleriniń suranysy. Biz jańa mamandyqtardy naryqta tanymal kásiptermen baılanystyrmaımyz. Negizinen olar - 100 paıyz ınjenerlik-tehnıkalyq mamandyqtar. Biz olardy naqty óńirlik kompanıalardyń suranysyna saı baılanystyramyz», - dedi Saıasat Nurbek Astana halyqaralyq forýmy aıasynda bergen suhbatynda.
Buǵan deıin mınıstr elimizde birqatar sheteldik jetekshi ýnıversıtetterdi ashý josparyn bólisken bolatyn.
«Bıyl bizge Kanada ýnıversıteti, Brıtan tehnıkalyq ýnıversıteti, nemis ýnıversıtetteriniń konsorsıýmy, úzdik ońtústikkoreılik ýnıversıtet, myqty ózbek ulttyq zertteý ınstıtýty jáne Reseıden jetekshi hımıa-tehnologıalyq ýnıversıtetterdiń biri kiredi», - degen edi Ǵylym jáne joǵary bilim mınıstri.