Almaty qalasynyń ákimi Baqytjan Saǵyntaev 25 maýsym kúni Ortalyq komýnıkasıalar qyzmeti alańynda baspasóz máslıhatyna qatysyp, BAQ ókilderiniń san túrli suraqtaryna jaýap berip, qalamyzdyń damýy men ekonomıka, ekologıa, bıznes, oqý-bilim, medısına salasyndaǵy ózekti máseleler men atqarylǵan isterge toqtaldy, bolashaq josparlarmen bólisti.
Megapolıs basshysynyń atqarylǵan ister jónindegi sózin tyńdaǵan qala turǵyndary búgin óz oılaryn ortaǵa saldy, dep habarlaıdy Almaty-akshamy.kz.
«Qala basshysy B.Saǵyntaev Nur-Sultandaǵy Ortalyq komýnıkasıalar qyzmeti alańynda megapolıstiń bolashaqtaǵy damý josparymen bólisti. Onyń ishinde kóptegen máseleler aıtyldy. Epıdemıologıalyq jaǵdaı, shaǵyn jáne orta bıznesti damytý, ındýstrıa, týrızm, ekologıa, áleýmettik qoldaý da nazardan tys qalǵan joq. Osynyń ishinde bilim salasyn arttyrýǵa qatysty aıtqan pikirleri erekshe unady. Qazir qalada balalarǵa arnalǵan dene shynyqtyrý-saýyqtyrý keshenderi salynyp jatyr.
Almaty jyl saıyn kórkeıip keledi. Qaı mekteptiń jaqsy ekenin ata-ananyń sol mektepke balalaryn berýge tyrysatynynan-aq bilýge bolady. Eshqandaı mektep ákimshiligi «bizdiń bilim ordasyna kelińiz» dep shaqyrmaıdy. Sol sekildi Almatynyń keremettigi sonshalyq, barsha halyq megapolıstiń aınalasynda turǵysy keledi. Shaharda halyq jyl saıyn kóbeıip jatyr. Qansha jaǵdaı jasaǵanmen, árıne aýdandar qosylǵan saıyn, halyq sany artqan saıyn jumys aıaqtalmaıdy. Qala ári qaraı damı beredi. Qazirdiń ózinde halyqqa barynsha jaqsy jaǵdaı jasalýda.
Sondyqtan jurtshylyq ta jasalǵan dúnıeniń qunyn bilýi kerek. Qalanyń damýyna ózderiniń úlesin qosýy tıis. Ekologıalyq jaǵynan, shahardy taza ustaýǵa janashyrlyqpen qarap, istelingen tirlikterge yqtıattyqpen, sonyń ıesi retinde ózderi de qolynan kelgen kómekterin aıamaýy qajet. Keıbireýler shet el tap-taza, keremet dep jatady. Ony sol eldiń Úkimeti emes, halyqtyń tazalyqqa degen kózqarasy túzý bolǵandyǵynan jaqsaryp jatyr. Sondyqtan biz de halyqtyń tazalyqqa degen mádenıetin arttyrýymyz kerek»,- deıdi ardager-ustaz Aıagúl Mırazova.