Almaty qalasynyń ákimi Baqytjan Saǵyntaev 25 maýsym kúni Ortalyq komýnıkasıalar qyzmeti alańynda baspasóz máslıhatyna qatysyp, BAQ ókilderiniń san túrli suraqtaryna jaýap berip, qalamyzdyń damýy men ekonomıka, ekologıa, bıznes, oqý-bilim, medısına salasyndaǵy ózekti máseleler men atqarylǵan isterge toqtaldy, bolashaq josparlarmen bólisti.
Megapolıs basshysynyń atqarylǵan ister jónindegi sózin tyńdaǵan qala turǵyndary búgin óz oılaryn ortaǵa saldy, dep habarlaıdy Almaty-akshamy.kz.
«Koronavırýstyq daǵdarystyń kórsetken basty sabaǵy – biz dárigerler men Jedel járdem qyzmetkerleriniń jaýapty jumysyna muqtajbyz, solardyń arqasynda bul indetti jeńetinimizge senemin. Kún demeı, tún demeı jumystaryn atqaryp jatyr, myń alǵys. Sondyqtan da, Almaty qalasy ákiminiń tarapynan dárigerlerge kórsetilip jatqan áleýmettik kómek – óte durys jáne qajetti sheshim.
Pandemıaǵa baılanysty dárigerlermen birge «qatardaǵy jaýynger» bolyp júrgender - bul, árıne – volonterlar. Elimizdiń jastary búkil jaýapkershilikti túsinip, qoryqpaı, kúreske atsalysqandary maqtanarlyq jaǵdaı. Sondyqtan da volonterler memleket olarmen birge ekenin sezinse, olardyń qatary úlkeımek, demek, el úshin qyzmet etetin adam sany da artady. Megapolıs basshysy Baqytjan Saǵyntaev áleýmettik kómek turǵysynda aıtyp ótkendeı, úı sertıfıkattaryn tabystaý Almatyda erekshe qarqyn alyp keledi. Búkil jastardyń problemasy – qonys. Eki-úsh jumysta istep, nesıe alyp júrgendikten, tabysy kóbirek jumys izdeıdi. Sondyqtan «Almaty jastary» baspana baǵdarlamasy jastar úshin óte úlken kómek. Úıiń bolsa, alańsyz óz mamańdyǵyna 100 paıyz berilip eńbek etesiń», - deıdi jastardyń belsendi ókili Almas Saǵynuly.