Aqtóbe oblysynda úsh kún ishinde júzden astam saıǵaq qyrylyp qalǵan, dep habarlaıdy Aqshamnews.kz.
Oqıǵa Qaıraqty ózeni mańynda bolǵan. Kóktemgi kóshi-qon kezinde shamamen 10 myńǵa jýyq saıǵaq sýatqa jaqyndap, jaǵasynda bir-birin taptap tastaǵan. Saldarynan janýarlar qyrylýǵa ushyraǵan.
Aqtóbe oblystyq orman sharýashylyǵy jáne janýarlar dúnıesi aýmaqtyq ınspeksıasynyń basshysy Ádilkereı Áýelbaevtyń aıtýynsha, qazirgi esep boıynsha 108 óli saıǵaq tabylǵan, onyń ishinde 65-i atalyq, 43-i analyq.
"Aldyn ala boljam boıynsha, janýarlar ózennen ótý kezinde birin-biri taptap ketken. Qazir oqıǵa ornynda mamandar jumys istep jatyr. Ólekseler men sýdan synamalar alynyp jatyr", - dedi ol.
Resmı derekterge súıensek, Aqtóbe oblysynda 300 myńnan astam saıǵaq bar. Qyrylǵan janýarlardyń ólekseleri jınalyp, kómilip, oqıǵa orny dezınfeksıalanǵan.