Mal qunyn sharyqtatpaı, halyqqa ońtaıly baǵany usynýǵa shaqyrdy.
Qazaqstannyń bas ımamy Naýryzbaı qajy Taǵanuly otandastaryna úndeý jarıalady. Bul úndeýde bas múftı aıt qarsańynda maldyń, azyq-túliktiń baǵasyn kótermeýge shaqyrdy, qarapaıym azamattardy qaıyrymdylyq sharaǵa qatysýǵa úgittedi, dep habarlaıdy Almaty-akshamy.kz Muftyat.kz caıtyna silteme jasap.
Sanaýly kúnderden keıin kúlli musylman halqy eń mańyzdy merekelerdiń biri – Qurban aıt meıramyn toılaıdy. Musylmandarǵa arnalǵan 2021 jyldyń kúntizbesine sáıkes, bıyl Qurban aıt 20, 21, 22 shilde kúnderi toılanady.
«Aıt kúnderi halyq tarapynan mal satyp alýǵa degen suranystyń arta túsetini belgili. Osy rette elimizdegi barsha sharýa qojalyqtarynyń qojaıyndaryn ulyq meıram – Qurban aıttyń qurmetine mal qunyn sharyqtatpaı, halyqqa ońtaıly baǵany usynýǵa shaqyramyn. Sonymen qatar, barsha kásipkerlerdi turǵyndar kúnde tutynatyn áleýmettik mańyzy bar azyq-túlik baǵasyna múmkindiginshe jeńildik jasaýǵa úndeımin»,– delingen múftıdiń úndeýinde.
Qazaqstannyń bas múftıi Naýryzbaı qajy Taǵanuly kásipkerler men bıznesmenderden ózge qatardaǵy otandastaryn qaıyrymdylyq sharaǵa qatysýǵa shaqyrdy.
«Ardaqty aǵaıyn, súıikti Paıǵambarymyz Muhammed (oǵan Allanyń salaýaty men sálemi bolsyn): «...Kimde-kim musylman baýyrynyń qajetine jarasa, Alla Taǵala da onyń qajetin óteıdi...» degen súıinshi habar jetkizgen. Qazaqstan musylmandary dinı basqarmasy qýańshylyqtan zardap shekken óńirlerdegi sharýalarǵa qoldaý kórsetý maqsatynda «Qıyndyqta el birge» atty qaıyrymdylyq aksıasyn bastady. Aksıa aıasynda Qyzylorda, Mańǵystaý oblystaryna jem-shóp jóneltiletin bolady. Osy ıgi iske úles qosyp, synaqty sátterdi bastan keship otyrǵan otandastarymyzǵa qol úshyn sozýǵa shaqyramyn»,– delingen bas múftıdiń úndeýinde.