25 maýsymda etnıkalyq qazaq balalaryna arnalǵan «Jas Qazaq» jazǵy-etno lageriniń ashylýy ótti
Syrtqy ister mınıstrligine qarasty «Otandastar qory» KEAQ uıymdastyrýymen jáne IQanat qorynyń qoldaýymen shetelde turatyn etnıkalyq qazaq balalaryna arnalǵan jazǵy etno-lager jumysyn bastady, dep habarlaıdy Almaty-akshamy.kz.
Otandastar qorynyń «Jas Qazaq» jazǵy etno-lageri tórtinshi ret uıymdastyrylyp jatyr. Osyǵan deıin 400-den asa qandas balalar qatyssa, bıyl Reseı, Mońǵolıa, Ózbekstan, Qyrǵyzstan, Qytaı, Ońtústik Koreıa jáne Iran elderinen 255 etnıkalyq qazaq balalary tarıhı otanyna keldi. Qatysýshylardyń arasynda tótenshe jaǵdaı kezinde qazaqstandyq dostaryna jylý jınaǵan mońǵolıalyq qazaq balalary, túrli baıqaýlarǵa qatysyp, bilimderi men biliktilikterin dáleldegen qarakóz qandastarymyz bar.
25 maýsym kúni lagerdiń resmı ashylý saltanatyna QR Parlamenti Májilisiniń depýtattary Bolat Kerimbek jáne Nurgúl Taý, Rossotrýdnıchestvonyń Astanadaǵy ókildik basshysy Olga Fılonova, «Otandastar qory» KEAQ prezıdenti Danıar Qadyrov jáne IQanat mektebiniń dırektory Zaıken Janat qatysyp, balalarǵa aqjarma tilekterin bildirdi.
Lager 2024 jylǵy 24 maýsym jáne 7 shilde aralyǵynda Býrabaıdaǵy «IQanat High School of Burabay» mektebi bazasynda ótedi. Balalar eki aptada qazaq tili, tarıhy men salt-dástúrin úırenip, ulttyq oıyndar men mýzykalyq aspaptarda oınaıdy, atqa minip, kıiz úı qurady, elimizdegi joǵary oqý oryndarynyń qatysýymen ótetin bilim kórmesine qatysady jáne eń bastysy álemniń kóptegen elinen dostar tabady.