Májilistiń jalpy otyrysynda premer-mınıstrdiń orynbasary Tamara Dúısenova elimizdegi ınternet máselesine toqtaldy, dep habarlaıdy almaty-akshamy.kz.
Internetke qatysty shaǵymnyń kóp ekenin ózimiz de bilip otyrmyz. Másele tek shalǵaı eldi mekenderde ınternettiń nashar bolýynda ǵana emes. Qalalarda da mobıldi baılanys pen ınternet sıgnalynyń kóńilden shyqpaýy baıqalady. Qordalanǵan máselelerdi júıeli túrde sheshý maqsatynda tıisti Ulttyq joba bekitildi jáne iske asyrylýda. Onyń aıasynda memlekettik-jekemenshik áriptestik tetigi arqyly 3010 aýylǵa optıkalyq baılanys jelilerin qosý kózdelýde, - dedi premer-mınıstrdiń orynbasary.
Aıtýynsha, búginde Qazaqstanda 6 290 aýyl bar, onyń ishinde symdy ınternet arqyly optıka 2 606 aýylǵa jetkizildi. Nátıjesinde 2,4 mln adamnyń ınternetke qoljetimdiligi qamtamasyz etiledi.
Mobıldi ınternet búginde 4 866 aýylda qoljetimdi. Ótken jyly 1 161 aýyl 4G tehnologıasyna qosyldy. Qalǵandary boıynsha jumys jalǵasýda. Astana, Almaty, Shymkent jáne oblys ortalyqtarynda 5G baılanyspen qamtýdy keńeıtý jumystary jalǵasýda. Búgingi tańda 20 qalada 1 144 bazalyq stansıa ornatylǵan. Memleket basshysynyń tapsyrmasyna sáıkes 5G uıaly baılanysyn engizý 2025 jyldyń sońyna deıin aıaqtalady, - dedi Tamara Dúısenova.