Mundaı járdemaqyny memleket azamattary múgedektigi boıynsha jáne asyraýshysynan aıyrylý jaǵdaıyna baılanysty ala alady.
Qazaqstandyqtarǵa jyl basynan beri múgedektik jáne asyraýshysynan aıyrylý jaǵdaıy boıynsha járdemaqy túrinde 260 mlrd teńgeden astam qarajat tólendi, dep habarlaıdy Almaty-akshamy.kz.
«2021 jylǵy qańtar-tamyz aılary aralyǵynda respýblıkalyq búdjetten múgedektigi boıynsha memlekettik áleýmettik járdemaqy tóleýge 206,6 mlrd teńge, asyraýshysynan aıyrylý jaǵdaıyna baılanysty memlekettik áleýmettik járdemaqy tóleýge 54,3 mlrd teńge baǵyttaldy», – delingen Eńbek jáne halyqty áleýmettik qorǵaý mınıstrliginiń baspasóz qyzmetiniń habarlamasynda.
2021 jyldyń tamyz aıynda respýblıkalyq búdjetten múgedektigi boıynsha memlekettik áleýmettik járdemaqy tóleýge 26,1 mlrd teńge, asyraýshysynan aıyrylý jaǵdaıy boıynsha memlekettik áleýmettik járdemaqy tóleýge 6,5 mlrd teńge jumsaldy.
2021 jylǵy 1 qyrkúıektegi jaǵdaı boıynsha, múgedektigine baılanysty memlekettik áleýmettik járdemaqy alýshylardyń sany 528,6 myń adamdy, asyraýshysynan aıyrylý jaǵdaıy boıynsha 160 myń adamdy quraıdy.
Múgedektik jáne asyraýshysynan aıyrylý jaǵdaıy boıynsha memlekettik áleýmettik járdemaqylardyń mólsheri múgedektiktiń tobyna jáne sebebine, qaıtys bolǵan (qaza tapqan) asyraýshynyń asyraýyndaǵy adamdar sanyna, sondaı-aq tıisti qarjy jylyna arnalǵan «Respýblıkalyq búdjet týraly» zańynda belgilenetin eń tómen kúnkóris deńgeıiniń shamasyna baılanysty bolady.
2021 jylǵy 1 qyrkúıektegi jaǵdaı boıynsha múgedektigi boıynsha memlekettik áleýmettik járdemaqynyń ortasha mólsheri 49 375 teńgeni, asyraýshydan aıyrylý jaǵdaıy boıynsha memlekettik áleýmettik járdemaqynyń ortasha mólsheri 40 543 teńgeni qurady.