Ana ólimi 2021 jylmen salystyrǵanda 3 esege tómendegen
Qazaqstandyqtardyń ortasha ómir súrý uzaqtyǵy alǵash ret 74,4 jasqa jetti. Ómir súrý uzaqtyǵynyń ósýine ekonomıkanyń damýy, áleýmettik ál-aýqat, onyń ishinde densaýlyq saqtaýdyń damýy, sondaı-aq halyqtyń salamatty ómir saltyn ustanýy sıaqty faktorlar áser etedi. Bul týraly Densaýlyq saqtaý mınıstrligi málimdedi, dep habarlaıdy Almaty-akshamy.kz.
Mınıstrliktiń málimetterine qaraǵanda, el basshylyǵy qoldaýynyń arqasynda respýblıkada joǵary tehnologıalyq medısınalyq qyzmetterdi, aýyl medısınasyn, densaýlyq saqtaý obektileriniń ınfraqurylymyn damytý jónindegi jumys kúsheıtildi, densaýlyq saqtaý júıesiniń profılaktıkalyq baǵyttylyǵy qamtamasyz etildi, aýyl turǵyndary úshin profılaktıkalyq tekserýler engizildi, balalardy profılaktıkalyq tekserý paketteri keńeıtildi, onkologıalyq jáne gematologıalyq aýrýlarǵa kúdik týyndaǵan kezde tekserýler jedeldetildi. Jedel medısınalyq kómek qyzmeti 1 367 birlik avtokólik satyp alý jolymen kúsheıtildi, bul el halqyna shuǵyl jáne jedel medısınalyq kómek kórsetý kezinde «altyn saǵat» qaǵıdatynyń saqtalýyn qamtamasyz etýge múmkindik berdi.
Kólik medısınasy jandandy, 77 myńnan astam turǵynǵa medısınalyq kómek kórsetken «Járdem» jáne «Salamatty Qazaqstan» 2 medısınalyq poıyzynyń jumysy qaıta jandandy. Shalǵaıdaǵy aýyldyq eldi mekenderde qolda bar 49 jyljymaly medısınalyq keshenge medısınalyq kómektiń qoljetimdiligin arttyrý maqsatynda qosymsha 100 zamanaýı JMK satyp alyndy, 2022 jyly JMK qyzmetterimen 3307 eldi meken qamtyldy, aýyl turǵyndaryna 1 820 833 emdeý-dıagnostıkalyq qyzmet kórsetildi, 149 326 naýqas anyqtaldy. Joǵary tehnologıalyq medısınalyq qyzmetterdi qarjylandyrý kólemi 3 ese, medısınalyq ońaltý jáne konsýltasıalyq-dıagnostıkalyq kómek 11 ese, onyń ishinde qymbat kórsetiletin qyzmetter 5 ese ulǵaıdy. Joǵaryda kórsetilgen sharalardy iske asyrý nátıjesinde elimizde densaýlyq saqtaýdyń negizgi medısınalyq-demografıalyq kórsetkishteriniń oń serpini baıqalady.
«2022 jyldyń qorytyndysy boıynsha QR-da jalpy ólim-jitim kórsetkishi 29%-ǵa tómendep, 1000 turǵynǵa shaqqanda 6,77 qurady. Qan aınalym júıesi aýrýlarynan bolatyn ólim-jitim 32,7%-ǵa, obyrdan – 7,9%-ǵa, jaraqattan – 5,3%-ǵa tómendedi. Ana ólimi 2021 jylmen salystyrǵanda 3 esege tómendep, 100 myń tiri týǵandarǵa shaqqanda 17 qurady, sábıler ólim-jitimi 9%-ǵa tómendep, 1000 tiri týǵandarǵa shaqqanda 7,68 qurady. Halyq densaýlyǵy kórsetkishterindegi oń ózgerister ómir súrý uzaqtyǵynyń ósýine áser etti jáne tarıhı mańyzǵa – 74,44 jasqa qol jetkizýdiń kepili boldy, ol pandemıaǵa deıingi ÓSU deńgeıinen 1,26 jasqa asyp tústi, al 2019 jyly ol – 73,18 jasty qurady»,- dep málimdedi DSM ókilderi.