Onkologıalyq aýrýlardy destıgmatızasıalaýdy qoldaý kórmesi
Osy jyldyń 3-14 mamyr aralyǵynda Qazaqstan Respýblıkasynyń Memlekettik ortalyq mýzeıinde onkologıalyq aýrýlardy destıgmatızasıalaýdy qoldaý maqsatynda «Ómirge-ómir jalǵassyn» kórmesi ótedi, dep habarlaıdy Almaty-akshamy.kz.
Kórmege Almaty qalasynyń, sonymen qosa qazaqstandyq jas sýretshilerdiń sıfrlyq jáne dástúrli keskindeme tehnıkasynda oryndalǵan týyndylary qoıylady. Kórmede aýrýdy jeńe alǵan úsh keıipkerdiń áńgimeleri, sondaı-aq olardy ashqan fotosýretteri basty oryn alady.
Kórmeniń basty maqsaty – kelýshilerge aýrýdy jeńgen keıipkerlerdiń jolyn túsinýge jáne sezinýge múmkindik berý.
Qazaqstandyq sýretshiler Baqyt Býbıkanova, Asqat Ahmedıarov, Arýjan Jumabek, Oleg Zýev jáne Georgıı Trákın-Buharovtyń jumystarynan quralǵan kórme Almaty qalasynda ótedi.
«Seniminmen» qorynyń músheleriniń aıtýynsha, onkologıalyq naýqastardy emdeý úshin eń mańyzdy qadam – psıhologıalyq kómek. Qordyń negizin qalaýshy psıhoterapevt, onkopsıholog Dınara Qusaıynovanyń aıtýynsha, qaterli isik naýqastyń moraldyq jaǵdaıyna qatty áser etedi. Psıhologıalyq kómek naýqastarǵa dıagnozyna baılanysty kúızelisti, mazasyzdyqty jáne úreıdi jeńýge múmkindik beredi.
Adamdarǵa onkologıa dıagnozyn qoıý – kóbinese úlken kúızeliske túsirip, túrli psıhıkalyq aýytqýlarǵa ushyratady. Bul aýrýdy bastan keshirý emosıonaldy jáne kognıtıvti kezeńderden turady. Dertke shaldyqqan adam stıgm áserinen aýrýdyń aldyn alý úshin tekseristen ótýge, dıagnozyn basqalarǵa aıtýǵa tartynshaqtaýyna baılanysty psıhologıalyq súıemeldeýdi talap etedi.
Álemdik tájerıbege súıenetin bolsaq, qaterli isikke shaldyqqan adamdar dertti jeńip shyǵý úshin, psıhologıalyq kómek onkologıalyq naýqastarǵa arnalǵan terapıanyń ajyramas bóligi bolyp tabylady, óıtkeni bul olarǵa oń kózqarasty saqtaýǵa jáne aýrýmen kúresýde tózimdilikti nyǵaıtýǵa kómektesedi.
«Seniminmen» qory – onkologıalyq aýrýdy jeńgen adamdardyń tabysty oqıǵalary men oń nátıjelerin atalmysh dertpen betpe-bet kelgen kóptegen adamdar men olardyń jaqyndaryn yntalandyryp, oń áserin tıgizedi dep úmittenedi.