Barlyq rólderdi jasóspirimder oryndaıdy
Almatyda V.Jeleznákovtyń balalar men jasóspirimder arasyndaǵy býllıng máselesin baıandaıtyn «Chýchelo» pesasy boıynsha qoıylymnyń kórsetilimi ótti, dep habarlaıdy Almaty-akshamy.kz.
Óńirlik komýnıkasıalar qyzmeti alańyndaǵy «Igra» balalar teatrynyń shyǵarmashylyq toby qoıylym ıdeıasynyń qaıdan shyqqanyn jáne atalǵan spektákldegi jumystyń qalaı júrgizilgenin aıtyp berdi.
Qoıylymda balalardyń da eresekterdiń de rólderin jasóspirim ártister somdaıdy. Teatrdyń negizin salýshylar býllıng taqyrybyn óte ózekti dep sanap, birneshe mysal keltirdi.
«Biz úshin balalardy qorǵaý máselesin kóterý óte mańyzdy. «Chýchelo» arqyly biz kórermenge oı salamyz. «Igra» teatr mektebiniń jetekshisi retinde meniń mindetim – jasóspirimder men jastardyń osy máselege nazaryn aýdartý», – dep bólisti teatr jáne kıno akteri, «Igra» balalar teatry mektebiniń negizin qalaýshy jáne jetekshisi Raýf Habıbýllın.
Spıker bul qoıylymdy qoıý rejıser ári ustaz, teatr jáne kıno akteri Rýstam Safarovtyń ıdeıasy ekenin atap ótti.
«Bizde jasóspirimderden jaqsy komanda jınaldy. Jumys barysynda biz Vladımır Jeleznıkovtyń pesasyn birge oqydyq. Ol sonaý keńes zamanynda jazylǵanymen, ony oqyp, jasóspirimdermen talqylaı kele, býllıng máselesiniń búgingi kúnde de ózekti ekenine kózimiz jetti. Spektákldi alty aıda qoıdyq. Shynymdy aıtsam, nátıjeniń munshalyqty qyzyq bolatynyn, ár túrli jastaǵy kórermenderdiń júregi men sanasyna jetetinin kútpedim», – deıdi R.Safarov.
Spektákl qoıýshylary balalar men jasóspirimderdiń máselelerin solardyń tilinde aıtý kerek deıdi.
«Barlyq rólderdi – balalardy da, eresekterdi de 13-14 jas aralyǵyndaǵy jasóspirimder oryndaıdy. Bul másele jasóspirimderdiń tilinde aıtylsa, kórermenge neǵurlym tereńirek jáne túsinikti jetedi. Materıaldyń baıaǵyda jazylǵanyna, qyryq jyl ótip ketkenine qarap, bireýlerde «nege bul materıaldy alyp jatyrsyń?» degen suraq týyndaýy múmkin, birden aıtaıyn, biz eshteńeni ózgertken joqpyz. Onyń negizin ózgertpeı, áńgimede qalaı jazylsa, solaı sahnaladyq. Bul taqyryp sol kezde de, qazirgi tańda da óte ózekti ekenin kórsetedi», - dep qosty R.Safarov.
Búgingi tańda teatr psıhologtarmen jumys jasaýda jáne mektepteptegi jasóspirimderdiń, ata-analardyń, muǵalimderdiń jáne t.b. nazaryn aýdarýdy josparlap otyr. Sonymen, qoıylymnyń kórsetiliminde kórermender arasynda balalar psıhology, mektepterdegi daǵdarystyq jaǵdaılardy sheshý jónindegi maman Anastasıa Steblánko boldy, ol teatrǵa birlesip jumys isteýdi usyndy.
«Qoılymdy kórip, býllıngti aldyn alýdyń jaqsy tásili ekenin túsindim, óıtkeni qoıylym býllıngtiń qalaı bastalatynyn, qurbany qandaı kezeńderden ótetinin jaqsy kórsetedi. Kóbinde býllıngtiń basty sebebi ishki, otbasylyq máseleler. Qazir biz «Chýchelo» spektaklin jasóspirimderge kórsetip, bul máseleni profılaktıkalyq jolmen sheshý úshin qaladaǵy memlekettik mektepterdiń birimen kelissózder júrgizip jatyrmyz», - dep bólisti ol.
Desek te, bul qoǵamdaǵy mańyzdy, áleýmettik máselelerdi kóterip otyrǵan teatr qoryndaǵy alǵashqy jáne sońǵy qoıylym emes. «Igra» teatrynyń kórermenderin eskere otyryp, taqyryptar negizinen balalar men jasóspirimderdiń máselelerine qatysty. Mamyr aıynda «Skazkı skvoz kamnı» qoıylymynyń premerasy kútilýde, onda basty keıipkerler úlkenderdiń kómeginsiz óz máselelerin sheshýge tyrysatyn jasóspirim qyzdar jaıly bolady.