Kórsetkish ótken jylmen salystyrǵanda 48% artty
1 shildedegi kórsetkish boıynsha, Biryńǵaı jınaqtaýshy zeınetaqy qorynyń salymshylary 13,4 trln teńge jınaǵan. Bul týraly Almaty-akshamy.kz qordyń resmı saıtyna silteme jasap habarlaıdy.
«2022 jyldyń 1 shildesindegi jaǵdaı boıynsha, Biryńǵaı jınaqtaýshy zeınetaqy qory salymshylarynyń shottarynda 13,4 trln teńge zeınetaqy jınaqtary qalyptasyp, byltyrǵymen salystyrǵanda ósim 616 mlrd teńgeni qurady. Zeınetaqy jınaqtarynyń negizgi bóligi mindetti zeınetaqy jarnalary esebinen túsken – 13 trln teńge boldy. Mindetti kásiptik zeınetaqy jarnalary boıynsha zeınetaqy jınaqtary 2021 jyldyń 1 shildesinen beri 19% kóbeıip, 394,3 mlrd teńgege, erikti zeınetaqy jarnalarynyń kólemi shamamen 2,7 mlrd teńgege jetti. Bul rette erikti zeınetaqy jınaqtary boıynsha kórsetkish ótken jylmen salystyrǵanda 48% artty», - dep jazylǵan resmı málimette.
Qordyń dereginen sensek, salymshylardyń 2021 jyldyń 1 shildesinen bergi taza ınvestısıalyq kirisi 338 mlrd teńgeden asqan.
«Jyl basynan beri BJZQ óz salymshylaryna 984,2 mlrd teńge tóledi. Onyń basym bóligi turǵyn úı jaǵdaıyn jaqsartý jáne emdelý maqsattaryna arnalǵan birjolǵy zeınetaqy tólemderi – 849,4 mlrd teńge», - delingen qordyń málimetinde.