Barlyǵymyz saıahatqa shyqqandy unatamyz. Jaz mezgili kele sala adamdar jazǵy demalysyn josparlaı bastaıdy. Bul oraıda kópshiligi qaı mezgilde qaı memleketke baryp demalǵan durys ári tıimdi ekenin bile bermeıdi. Sebebi ár mezgildiń óz ereksheligi bolady. Osyǵan oraı Egemen.kz tilshisi tórt túrli mezgilde qaı elge baryp demalǵan durys ekendigin anyqtady, dep habarlaıdy Almaty-akshamy.kz.
Saıahattaýdy unatpaıtyn adam kemde-kem. Jyldyń qaı mezgili bolsyn kóptegen azamattar shetelge shyǵyp demalǵandy jón kóredi. Osyǵan oraı eń aldymen suranysqa ıe memleketter qataryn anyqtap alý qajet.
Bul jaıynda «Gotour» týrısik agenttiginiń ofıs basshysy Aısulý Magzımbaeva aıtyp berdi. Onyń aıtýynsha, qazirgi ýaqytta Túrkıa, Egıpet, BAÁ elderine suranys kóp.
«Suranysqa ıe memleketter qatarynda Túrkıa, Egıpet, Birikken arab ámirligi bar. Sondaı-aq bıyl jazda qazaqstandyqtar úshin Maldıv araldaryna ushý tıimdi bolady. Sebebi Maldıv araldaryna arnalǵan tikeleı charterlik reıster (All inclusive) ashyldy. Bul baǵa jaǵynan Túrkıa elimen salystyrǵanda shamaly aıyrmashylyqty ǵana quraıdy. Sondaı-aq jańadan ashylǵan áýe baǵyty – Qatar memleketi. Bul eldiń Doha qalasyna ushý otandastyrymyz úshin tıimdi bolady», -deıdi ofıs basshysy.
Mamannyń aıtýynsha, ár elge ushý sol eldiń óziniń baǵasyna jáne ushý uzaqtyǵyna baılanysty bolady. Sonymen qatar janarmaıdyń qymbattaýyna baılanysty bılet quny ózgeredi.
«Qazirgi tańda eń arzan memleket – Birikken arab ámirligi. Bul memleketke 1 aptaǵa saıahatqa shyǵý bir adamǵa shamamen 180-200 myń teńgeni quraıdy», -deıdi A.Magzımbaeva.
Sonymen qatar ár jyl mezgilinde aýa raıyna baılanysty ártúrli memleketterge saıahatqa shyqqan abzal. Mysaly mamannyń aıtýy boıynsha, kóktem jáne kúz mezgilderinde kóbine BAÁ, Mysyr, Qatar, Taıland elderine ushqan durys.
«Taıland, Goa, Maldıv araldaryna qys aılarynda ushqan óte jaqsy. Kóktem aıynda Vetnam memleketine naǵyz saıahat maýsymy bastalady. Jaz aılarynda árıne Túrkıa memleketi suranysta bolady. Mysyrdy da qarastyrýǵa bolady, sebebi ol jaqtyń klımaty qurǵaq bolǵandyqtan ystyǵy jeńil seziledi. Sondaı-aq Vetnam jáne Evropa elderine ushý jaz aıynda óte tıimdi bolady. Bıylǵy kúz mezgilinde Haınan araldaryna baǵyttalǵan jańa áýe reısiniń ashylýy kútiledi», -deıdi maman.
Ár memlekettiń óziniń salty bolǵandyqtan, sol memleketke barar aldynda aldymen týragenttikten aldyn-ala saparǵa shyǵatyn memleket jaıly bilip alǵan jón. Mysaly, Mysyrda teńizden Qyzyl kitapqa engizilgen tas, rakýshka, karal alýǵa qatań tyıym salynǵan. Alǵan jaıǵdaıda úlken mólsherde aıyppul salynady. Sonymen qatar musylman elderinde qatty ashyq kıinip, jaqyndasýǵa bolmaıdy.