«Jolaýshylar tasymaly» AQ jolaýshylarǵa arnalǵan «Poıyz qozǵalysynyń onlaın taqtasy» atty jańa sıfrlyq servısti qoldanysqa engizdi.
Endi jolaýshylar naqty ýaqyt rejıminde poıyzdardyń kelý jáne ketý ýaqytyn baqylap, qozǵalys kestesindegi ózgerister týraly jedel aqparat ala alady, dep habarlaıdy aqshamnews.kz.
Rail-news.kz málimetinshe, atalǵan qyzmet «Jolaýshylar tasymaly» AQ Sıtýasıalyq ortalyǵy aıasynda ázirlendi.
Ortalyq jolaýshylar poıyzdarynyń qozǵalysyn táýlik boıy baqylap, monıtorıń júrgizedi. Poıyzdarǵa ornatylǵan GPS-trekerler derekterdi avtomatty túrde ortalyqqa jiberip, poıyzdardyń ornalasqan jerin dál anyqtaýǵa jáne qozǵalys kestesin jedel jańartýǵa múmkindik beredi. Jańa servıs jolaýshylarǵa bilet.railways.kz resmı saıtynda qoljetimdi, - delingen málimette.
Poıyz qozǵalysy týraly aqparat alý úshin:
- https://bilet.railways.kz saıtyna kirý qajet.
- «Poıyz qozǵalysynyń onlaın taqtasy» bannerin basý kerek.
- Kartadan qajetti poıyzdy tańdaý qajet.
- Sondaı-aq qyzmetke https://tablo-railways.kz/ru/ saıty arqyly da kirýge bolady.
«Poıyz qozǵalysynyń onlaın taqtasy» jolaýshylarǵa naqty ýaqyt rejıminde poıyzdyń qozǵalysyn kartadan baqylaýǵa (poıyz qyzyl túspen belgilenedi), tańdaǵan stansıadaǵy kelý jáne jóneltý kestesin tekserýge, qozǵalys kestesindegi ózgeristerdi baqylaýǵa, barlyq aıaldama stansıalaryn, olardyń kútý ýaqytyn jáne mejeli beketke shamamen kelý ýaqytyn kórýge múmkindik beredi, - dep tolyqtyrdy kompanıa.
Tablo-railways.kz saıtynda poıyz bıletterin onlaın satyp alý, elektrondy otyrǵyzý talonyn alý, oryndardy talap-shaǵym boıynsha qaıtarý, poıyzdar kestesin qaraý jáne júkterdiń qunyn esepteý sıaqty qosymsha qyzmetter qoljetimdi.