Ózbekstan men Qazaqstannyń resmı vedomstvolary eki el azamattarynyń memlekettik shekaradan ulttyq jeke kýálik (ID karta) arqyly ótýine ruqsat berý máselesin talqylap jatyr.
Bul týraly Ózbekstan Prezıdentiniń syrtqy saıasat jónindegi arnaıy ókili Abdýlazız Komılovtyń «Jańa Ózbekstan» gazetasynda jarıalaǵan maqalasynda aıtylǵan, dep habarlaıdy aqshamnews.kz.
Saıasatker Astana qalasynda ótken Ortalyq Azıa elderi basshylarynyń altynshy Konsýltatıvtik kezdesýi aımaqtaǵy barlyq elderdiń keıingi alty jyldaǵy kezekti tóraǵalyǵynyń nátıjesin sımvoldy qorytyndysy bolǵanyn aıtyp, bul format memleketaralyq yntymaqtastyqtyń jańa kezeńin bastap bergenin málimdegen.
«Búginde Ózbekstan men Ortalyq Azıa elderi arasyndaǵy shekarany dostyq pen tatý kórshilik kópiri dep ataýǵa bolady. 2023 jyldyń 1 qyrkúıeginen bastap Ózbekstan-Qyrǵyzstan shekarasynan ótýde azamattar ID kartany paıdalanýda. Dál osyndaı joba Qazaqstanmen de talqylanýda», - dep jazady Abdýlazız Komılov óz maqalasynda.
Sonymen qatar ol Ózbekstan men Qazaqstan shekarany zańdy túrde resimdeýdi tolyq aıaqtaǵanyn, Túrkimenstan, Tájikstan jáne Qyrǵyzstanmen memlekettik shekara delımıtasıalanǵany, qazirgi kezde elder arasyndaǵy ótkizý beketteri óz jumysyn qalpyna keltirip, azamattardyń qozǵalysy aıtarlyqtaı jeńildegenin jetkizgen.