Óńirlik komýnıkasıalar qyzmetiniń baspasóz konferensıasynda Ádilet departamentiniń basshysy Balaım Kesebaeva málimdegendeı, Ádilet mınıstrligi Notarıattyq palatamen birlesip birqatar notarıaldyq qyzmetterdi onlaın-formatqa kóshirdi. Endi azamattar notarıýsqa barmaı-aq senimhattardy, erli-zaıyptylardyń kelisimderin rásimdep, beıneqońyraý arqyly zańgerlik keńes ala alady, dep habarlaıdy aqshamnews.kz
«Notarıattyq qyzmetterdiń sıfrlandyrylýynyń arqasynda azamattar úıden shyqpaı-aq shamamen 200 myń senimhat pen 70 myń erli-zaıyptylar kelisimin rásimdedi», – dedi Balaım Kesebaeva.
Barlyq rásimdelgen qujattar avtomatty túrde «Sıfrlyq qujattar» servısine júkteledi jáne olarǵa yńǵaıly qoljetimdilikti qamtamasyz etedi.
Jeke tulǵany sáıkestendirý úshin bıometrıa qoldanylady, bul syrttaı uqsas tulǵalardy tanýdaǵy qatelikterdi boldyrmaýǵa múmkindik beredi. Qosymsha qaýipsizdik maqsatynda SMS-kod pen ESQ arqyly eki faktorly aýtentıfıkasıa qarastyrylǵan.