Qazaqstanda sıfrlyq tehnologıalar quqyq salasyna belsendi túrde engizilýde. Óńirlik komýnıkasıalar qyzmetiniń baspasóz konferensıasynda Ádilet departamentiniń basshysy Balaım Kesebaeva málimdegendeı, Ádilet mınıstrligi quqyqtyq qyzmetterdiń sapasy men qoljetimdiligin arttyrýǵa baǵyttalǵan «Digital Justice» bastamasy aıasynda birqatar jobalardy júzege asyrýda, dep habarlaıdy aqshamnews.kz
Mańyzdy sheshimderdiń biri – «E-ZanKomegi» biryńǵaı quqyqtyq kómek kórsetý aqparattyq júıesin qurý boldy. Bul júıe qazirdiń ózinde 1949 advokat pen zańgerlik keńesshilerdi biriktiredi. 2023-2024 jyldary júıe arqyly 88 738 is óńdelip, portal qoldanýshylarynyń sany 6 749 adamǵa jetti.
Azamattardyń yńǵaılylyǵy úshin «Beıneqońyraý» fýnksıasy iske qosyldy, bul quqyqtyq qyzmet operatorlarynan táýlik boıy keńes alýǵa múmkindik beredi. Buǵan qosa, «Zan Komegi» mobıldi qosymshasynda jasandy ıntellekt elementteri bar chat-bot synaqtan ótýde. Jańa JI árbir ótinishtiń erekshelikterin eskerip, paıdalanýshylarǵa jeke usynystar beredi.
«Ádilet mınıstrligi zań qyzmetterin kórsetýge arnalǵan platformalardy ázirleıtin eldegi jetekshi IT-kompanıalar men ýnıversıtetter ókilderinen jumys tobyn qurdy», – dep atap ótti Balaım Kesebaeva.
Mańyzdy qadamdardyń biri – Qazaq ulttyq tehnıkalyq ýnıversıtetine zańgerlik keńes berý úshin jasandy ıntellekt ázirleýge grant bólý boldy. Sondaı-aq, Halyqqa qyzmet kórsetý ortalyqtaryna (HQKO) uqsas «zań klınıkalaryn» ashý josparlanýda, onda azamattar tegin zańgerlik kómek ala alady.
Sonymen qatar, ál-Farabı atyndaǵy Qazaq ulttyq ýnıversıtetiniń sýperkompúteri jasandy ıntellekt júıesin Qazaqstannyń barlyq aýmaǵynda engizýge múmkindik beredi, bul azamattarǵa zamanaýı quqyqtyq qyzmetterdi keńinen qoljetimdi etedi.