Halyq arasynda altynǵa ınvestısıa quıý qyzyǵýshylyǵy artqan
2022 jylǵy naýryzda ekinshi deńgeıli bankter men jekelegen banktik emes aıyrbastaý pýnkteri jalpy salmaǵy 167,2 keli 8 269 altyn quımasyn satty. Bul 2021 jyldyń osy kezeńimen salystyrǵanda 3 ese kóp, dep habarlaıdy Almaty-akshamy.kz Elorda.info-ǵa silteme jasap.
Ulttyq banktiń habarlaýynsha, satylymnyń ulǵaıýyna altynǵa ınvestısıa quıýǵa qyzyǵýshylyǵy artqan halyqtyń suranysy yqpal etip otyr. Sebebi qarjy naryǵyndaǵy belgisizdik pen valúta baǵamy qubylmaly bolyp turǵan shaqta kópshilik buǵan jınaqtarynyń saqtalýyn qamtamasyz etýdiń balamaly quraly retinde qaraıdy.
Halyqqa tazartylǵan altyn quımalardy satý jáne satyp alý baǵdarlamasyn Ulttyq Bank 2017 jyly iske qosqan edi. Baǵdarlama qolǵa alynǵaly jalpy salmaǵy 3 tonnaǵa jýyq 87 531 altyn quıma satyldy.
«Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda óte joǵary suranysqa ıe túri – 10 gramdyq quıma. Jalpy satylǵan quımalar arasynda onyń úlesi – 27%, ıaǵnı, 23 390 dana. Odan keıin 20 gramdyq quıma suranysqa ıe, 18 178 dana (21%), 100 gramdyq quımadan 18 034 dana (20%), 5 gramdyq quımadan 16 834 dana (19%), 50 gramdyq quımadan 11 095 dana (13%) satyldy. Altyn quımalar Almaty, Nur-Sultan jáne Atyraý qalalarynda kóp satylady», - delingen habarlamada.
Altyn quımalar senimdi ınvestısıa quraly bola alady. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, altyn quımalardy keri satyp ala alady.
Baǵdarlama bastalǵannan beri ekinshi deńgeıli bankter men jekelegen banktik emes pýnkter jalpy salmaǵy 303,3 keli 12 367 altyn quımany keri satyp alǵan, bul – jalpy satylǵan altyn quımalardyń 14%-y. Olar keri satyp alǵan altyn quımalardyń barlyǵy Ulttyq Banktiń fılıaldary arqyly halyqqa satylady.
«Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorappen shyǵarylady, sol arqyly quımanyń ashylǵan-ashylmaǵanyn ońaı tekserýge bolady. Qorǵanysh qoraby, sondaı-aq sapa sertıfıkaty bolyp sanalady. Sondyqtan altyn quımany uqyppen saqtap, qorabyn búldirmeýge keńes beremiz», - delingen habarlamada.
Qazir altyn quımalardy Halyk Bank, Eýrazıalyq Bank, Jusan Bank, SentrKredıt Banki, sondaı-aq jekelegen banktik emes pýnkterden satyp alyp, keri satýǵa bolady.