Boao qalasynda (QHR) Boao Azıa forýmynyń plenarlyq sesıasynyń ashylý rásimi ótti. Bıylǵy forým «COVID-19 pandemıasy jáne álem: halyqaralyq damýǵa birlesip yqpal etý jáne ortaq bolashaq qurý» taqyrybymen ótip jatyr.
QR Premer-Mınıstri Álıhan Smaıylov is-shara qatysýshylaryna beınebaılanys arqyly sóz sóıledi. Óz sózinde ol qazirgi ýaqytta Úkimet qazaqstandyqtardyń ál-aýqatyn arttyrý men sapaly damýdy qamtamasyz etýge baǵyttalǵan birqatar ekonomıkalyq reformany júzege asyryp jatqanyn atap ótti, dep habarlaıdy Almaty-akshamy.kz Primeminister.kz-ke silteme jasap.
«Bıyl naýryz aıynda Memleket basshysy Qasym-Jomart Kemeluly Toqaev jańa saıası reformalardyń aýqymdy baǵdarlamasyn usyndy. Mańyzdy saıası reformalardy jáne daǵdarysqa qarsy keshendi sharalardy iske asyrý úshin jalpyulttyq jospar bekitildi. Bul sharalar memlekettiń áleýmettik mindettemelerin iske asyrýǵa jáne ornyqty damýǵa qolaıly jaǵdaı jasaýǵa múmkindik berdi», — dedi Á. Smaıylov.
QR Premer-Mınıstri forým taqyryby pandemıadan keıingi damýǵa álemdik qoǵamdastyqtyń alańdaýshylyǵyn tolyq kórsetetinin atap ótti. Óz kezeginde, Qazaqstan pandemıadan týyndaǵan daǵdarysty tez arada eńserýge jáne turaqty halyqaralyq ekonomıkalyq baılanystardy qalpyna keltirýge múddeli. Osyǵan baılanysty QR Úkimetiniń basshysy DDSU-nyń COVID-19-ǵa qarsy jahandyq vaksınalaýdy qamtamasyz etý jónindegi strategıasyn ustanyp, vaksınalar men emdeý quraldaryn ádil bólý jónindegi erejeler jınaǵyn ázirleýdi usyndy. Sonymen qatar Álıhan Smaıylov «Bir beldeý, bir jol» bastamasy aıasynda yqpaldastyqtyń joǵary serpinin qoldaýdyń mańyzdylyǵyn atap ótti.
«Qazaqstan “Jibek jolynyń ekonomıkalyq beldeýiniń” negizgi býyny retinde halyqaralyq tranzıttik tasymaldardy úzdiksiz qamtamasyz etýdi kúsheıtedi. Osyǵan baılanysty sheteldik áriptesterge tasymaldaý qaýipsizdiginiń joǵary talaptaryna jaýap beretin jáne júkterdi transkontınentaldyq tasymaldaýǵa degen suranysty tolyq kólemde qamtamasyz etýge qabiletti Transkaspıı halyqaralyq kólik baǵdaryn belsendi túrde paıdalanýdy usynamyz», — dedi QR Úkimetiniń basshysy.
Sharaǵa onlaın-formatta Izraıl, Fılıppın, Mońǵolıa, Nepal memleketteriniń basshylary, sondaı-aq Laos Premer-Mınıstri men birqatar halyqaralyq uıym basshylary qatysty.