Ár azamatqa birdeı múmkindik beretin ádil memleket bolamyz, dedi búgin Qazaqstan halqy Assambleıasynyń HHHİ sesıasynda sóz sóılegen Qasym-Jomart Toqaev.
«Men buǵan deıin aıtqanymdaı, Jańa Qazaqstan degenimiz – bul Ádiletti Qazaqstan. Ár azamatqa birdeı múmkindik beretin ádil ári damyǵan memleket bolamyz», - dedi Prezıdent Assambleıa múshelerine arnaǵan sózinde.
Memleket basshysy barlyq josparymyzdy mindetti túrde júzege asyratynymyzǵa kámil senetinin aıtty.
«Biz Ekinshi Respýblıkany birge quramyz, Jańa Qazaqstandy birge órkendetemiz!», - dedi Q. Toqaev.
Memleket basshysy usynǵan «Ekinshi Respýblıka» uǵymy shyn mánisinde, keleshegi kemel el qurýdy kózdeıdi. Bıylǵy Joldaýda usynylǵan konstıtýsıalyq reformalardyń saıası máni de osynda – bul sýperprezıdenttikten prezıdenttik basqarý formasyna kóshý maqsatynda «Ekinshi Respýblıkanyń» konstıtýsıalanýy. «Ekinshi Respýblıka» modeli - Qazaqstannyń bılik ınstıtýttaryn qalyptastyrýdyń jańa modeli. Oǵan sáıkes Prezıdenttiń ókilettigi qysqaryp, Parlament pen máslıhattardyń pármeni artady. Qazaqstandyqtar memleket jáne qoǵam isine belsene atsalysatyn bolady, osylaısha, «halyq únine qulaq asatyn memleket» tujyrymdamasy nyǵaıa túsedi.
Sóz sońynda Memleket basshysy jurtshylyqty alda kele jatqan Qazaqstan halqynyń birligi kúnimen jáne Oraza aıt merekesimen quttyqtady.