Qazaqstanda jańa avtokólikter satylymynyń ósimi álemdik ortasha kórsetkishten 6 ese joǵary.
Finprom.kz portalynyń málimetinshe, osy jyldyń alǵashqy bes aıynyń qorytyndysy álemdik avtoónerkásip is júzinde qalpyna kelgenin senimdi túrde kórsetip otyr. 2023 jyldyń qańtar-mamyrynda álem boıynsha 34,8 mln jańa avtokólik satylǵan, dep habarlaıdy Almaty-akshamy.kz QazAqparatqa silteme jasap.
Bul 2022 jyldyń qańtar-mamyrymen salystyrǵanda 10,5 paıyzǵa joǵary. Álemde árbir úshinshi jańa kólik Qytaıda satylǵan – 10,4 mln avtokólik, bir jylda 10,5 paıyzǵa artqan. Odan keıin AQSH (6,3 mln avtokólik) jáne Batys Eýropa (5,4 mln avtokólik) elderi tur.
Byltyrǵymen salystyrǵanda Japonıada jańa kólik satylymy aıtarlyqtaı ósti: 17,5 paıyzǵa artyp, 2023 jyldyń qańtar-mamyr aılarynda 2 mln boldy. Odan keıingi orynda Shyǵys Eýropa, onyń ishinde Túrkıa (16,4%) jáne Batys Eýropa (16,3%) tur. Bul rette kórshiles Reseıde bıyl qańtar-mamyrda bar bolǵany 225,5 myń jańa kólik satylǵanyn atap ótken jón. Bul byltyrǵy sáıkes kezeńmen salystyrǵanda 26 paıyzǵa az.
Álem boıynsha alǵanda Qazaqstanda ahýal jaqsyraq. Bıyl qańtar-mamyrda satylym 66,3 myń jańa avtokólikke jetti. Kórsetkish 2022 jyldyń qańtar–mamyr aılarymen salystyrǵanda birden 65,8 paıyzǵa kóterildi. Sonymen qatar ekinshi aı qatarynan bir aıdaǵy rekordtyq kórsetkish tirkelip otyr. Bıyl mamyrda 14,7 myń jańa kólik satyldy. Bul qazaqstandyqtardyń avtosalondardaǵy kezekpen qoshtasqanyn kórsetedi.