Múddeli memlekettik organdar Dúnıejúzilik bank sarapshylarymen birlesip QR Eńbek jáne halyqty áleýmettik qorǵaý mınıstrligi daıyndaǵan eń tómengi jalaqy mólsherin aıqyndaý ádistemesiniń jobasyn jáne Eńbek kodeksine túzetýlerdi zańnamalyq bekitý úshin qajet ádistemelerdi kelisti, dep habarlaıdy Almaty-akshamy.kz.
Ádistemege sáıkes ETJ mólsheri medıanalyq jalaqy men eńbek ónimdiligine qaraı aıqyndalady. Qazir QR prezıdentiniń Ákimshiligine Eńbek kodeksine engizilgen túzetýler kelisý úshin jiberildi, maquldanǵannan keıin zańnamaǵa tıisti ózgeristerdi iske asyrý bastalady. Eńbekmıni Dúnıejúzilik bank sarapshylarymen birlesip halyqaralyq tájirıbege taldaý júrgizdi. Ol ETJ belgileý boıynsha neǵurlym keń taralǵan úsh tásildiń bar ekenin kórsetti:
- biryńǵaı ulttyq ETJ (Fransıa, Germanıa, Ispanıa);
- óńirler, salalar jáne kásiporyndar boıynsha ETJ saralanǵan mólsheri; (Fınlándıa, Japonıa, Belgıa);
- ár túrli sanattaǵy qyzmetkerlerge arnalǵan ETJ (Ulybrıtanıa, Danıa).
«Búginde ETJ Halyqaralyq eńbek uıymyna (budan ári – HEU) múshe elderdiń 90%-dan astamynda bar, ol onyń mólsheriniń barabarlyǵyn baǵalaý úshin Keıs ındeksin (zańmen belgilengen ETJ medıanalyq jalaqyǵa qatynasy) paıdalanýdy usynady. HEU usynystaryna sáıkes Keıs ındeksi 50% deńgeıinde bolýy kerek. Bul rette álemniń damyǵan elderinde ol shamamen 55%-dy, al damýshy elderde shamamen 67%-dy quraıdy», - delingen Eńbekmın habarlamasynda.
2008 jyldan 2018 jylǵa deıingi kezeńde ETJ mólsheri eń tómengi kúnkóris deńgeıinde belgilendi jáne jyl saıyn ınflásıa deńgeıine ındeksteldi. 2019 jyly ETJ mólsherin 1,5 ese – 28 284 teńgeden 42 500 teńgege deıin arttyrý júrgizildi. Bıyl eń tómengi jalaqy mólsheri 70 myń teńgege deıin ulǵaıtyldy. Bul rette joǵaryda kórsetilgen ETJ-ny arttyrý medıanalyq jalaqynyń shamasyn esepke almaı júrgizildi.
Halyqaralyq tájirıbeni, el ekonomıkasy qurylymynyń erekshelikterin eskere otyryp, Eńbekmıni Dúnıejúzilik banktiń sarapshylarymen birlesip, medıanalyq jalaqy men eńbek ónimdiliginiń araqatynasyn eskeretin ETJ anyqtaý ádistemesiniń (budan ári – Ádisteme) jobasy ázirlendi. Bul jumyskerlerdiń tabystary men óndiriletin taýarlar, jumystar men kórsetiletin qyzmetter kólemi arasynda naqty ózara baılanys ornatýǵa, sondaı-aq ETJ mólsherin HEU usynymyna jaqyndatýǵa múmkindik beredi. ETJ mólsherin anyqtaý úshin medıanalyq jalaqy men eńbek ónimdiligin paıdalaný jetkiliktilik pen tólem qabilettiligi negizinde teńgerimdi qamtamasyz etýge múmkindik beredi.
Jetkiliktik – bul qyzmetkerlerdi olardyń eńbegi úshin ádil jáne barabar tabyspen qamtamasyz etý. Tólem qabilettiligi – bul jumys berýshilerdiń óz eńbek shyǵyndaryn kásiporynnyń qyzmetkerlerin jaldaýy men básekege qabilettiligine teris áser etpeıtin deńgeıde ustap turý múmkindigi.