«Memlekettik anýıtettik kompanıa «Ómirdi saqtandyrý kompanıasy» AQ derekteri boıynsha 2024 jyly 37,7 myń qazaqstandyq úshin saqtandyrý tólemderiniń kólemi 2,4 mlrd teńgeden asty, dep habarlaıdy aqshamnews.kz.
«Negizgi mindetterdiń biri jumyskerlerdi eńbek mindetterin oryndaý kezinde jazataıym oqıǵalardan mindetti saqtandyrýdy qamtamasyz etý bolyp tabylady. Jumys berýshige osyndaı sharttar jasasqany úshin jaýapkershilik júkteledi, al bul mindettemeden jaltarǵan jaǵdaıda aıyppul sanksıalary kózdeledi. Búginde MAK-ta jumys berýshilermen jasalǵan 1,8 myń shart boıynsha 50 901 jumysker saqtandyrylǵan», – dep atap ótti MAK basqarma tóraǵasy Qýanysh Muqajanov.
Áleýmettik táýekelder týyndaǵan kezde saqtandyrylǵan jumyskerler úshin MAK-tan mynadaı tólem túrleri júzege asyrylady:
- densaýlyqqa zıan keltirýge baılanysty qosymsha shyǵyndardy óteý (dárilik zattar, ońaltý quraldary jáne sanatorıılik-kýrorttyq emdeý);
- kásiptik eńbekke qabilettiliginen aıyrylǵan adamdar úshin anýıtettik saqtandyrý boıynsha merzimdi tólemder (óndiristegi jazataıym oqıǵaǵa baılanysty);
- asyraýshysynan aıyrylýyna baılanysty anýıtettik saqtandyrý boıynsha merzimdi tólemder;
- zeınetkerlik aldyndaǵy anýıtet sharttary boıynsha merzimdi tólemder (zıandy jaǵdaılarda jumys isteıtin);
- óndiristegi jazataıym oqıǵa saldarynan qaıtys bolǵan jaǵdaıda jumyskerlerdi jerleý boıynsha shyǵystar.
Budan basqa, MAK «Demeý» ómirdi erikti saqtandyrý jáne zeınetaqy anýıteti qyzmetterin usynady.
BJZQ-da zeınetaqy jınaqtarynyń jetkilikti somasy bolǵan kezde zeınetaqy anýıteti shartyn jasasý azamattarǵa zeınetaqy tólemderin belgilengen zeınetaqy jasynan erte alýǵa múmkindik beredi. Atap aıtqanda, er adamdar 55 jastan bastap, al áıelder 53 jastan bastap tólem alýyna bolady. Bul rette keminde bes jyl ishinde jumys berýshiler olar úshin mindetti kásiptik zeınetaqy jarnalaryn júrgizilgen qazaqstandyqtar 50 jastan bastap tólemderdi ala bastaıdy.
Zeınetaqy anýıtetiniń basty artyqshylyǵy saqtandyrý kompanıasyna aýdarylǵan jınaqtardyń kólemine qaramastan, tólemderdi ómir boıy júzege asyrý bolyp tabylady.
2025 jyly zeınetaqy anýıteti shartyn jasasý úshin jınaqtardyń tómendegideı somasy qajet:
- erler úshin – 9 123 466 teńge;
- áıelder úshin – 11 963 930 teńge;
- mindetti kásiptik jarnalary bar er adamdar úshin – 7 744 625 teńge;
- mindetti kásiptik jarnalary bar áıelder úshin – 10 101 751 mln teńge.
Qýanysh Muqajanovtyń aıtýynsha, 2024 jyly jumyskerlerdi mindetti saqtandyrý sharttary boıynsha jınalǵan saqtandyrý syılyqaqylarynyń kólemi 1,4 mlrd teńgeni, al zeınetaqy anýıteti sharttary boıynsha jınalǵan saqtandyrý syılyqaqylarynyń kólemi 1,2 mlrd teńgeni qurady.
Osylaısha, búginde MAK saqtandyrýdyń 3 túri boıynsha qyzmet kórsetedi. 2024 jyldyń qorytyndysy boıynsha barlyq saqtandyrý ónimderi boıynsha MAK-ta 51,3 myń azamat boıynsha 2,2 myńnan astam shart tirkelgen.