Atalmysh shara 4 qazanǵa deıin jalǵasady.
20 qyrkúıekte kadr tapshylyǵy nemese bilim sapasy tómen óńirlerge Úzdik muǵalimderdi tartýdyń arnaıy baǵdarlamasyna qatysý úshin qujat qabyldaýdyń úshinshi kezeńi bastalady, dep habarlaıdy Almaty-akshamy.kz.
Alǵashqy eki baıqaýdyń qorytyndysy boıynsha 1,5 myńnan astam pedagogten ótinish túsken bolatyn.
«Memleket basshysynyń tapsyrmasy boıynsha Oqý-aǵartý mınıstrligi kadr tapshylyǵy bar nemese bilim sapasy salystyrmaly túrde tómen aımaqtarǵa úzdik muǵalimderdi tartý úshin arnaıy baǵdarlama ázirlegen bolatyn. Másele Túrkistan, Atyraý, Mańǵystaý jáne Almaty oblystary týraly bolyp otyr. Bul aımaqtarǵa matematıka, fızıka, hımıa, orys tili men ádebıeti, shet tili muǵalimderi qajet», - delingen Oqý-aǵartý mınıstrliginiń baspasóz qyzmetiniń habarlamasynda.
Arnaıy baǵdarlamada muǵalimderdi qoldaý sharalarynyń paketi bar, atap aıtqanda, laýazymdyq jalaqynyń 250% mólsherinde jalaqyny qamtamasyz etý, bul sondaı-aq jalǵa alǵan páter jáne komýnaldyq qyzmetter tólemin óteýdi qamtıdy.
Konkýrsqa qatysý úshin qujattardy qabyldaýdyń birinshi kezeńi 16 maýsymda bastaldy. Ekinshi baıqaý 11-21 shilde aralyǵynda ótti. Al úshinshi kezeń 20 qyrkúıekte bastalyp, 2022 jylǵy 4 qazanǵa deıin jalǵasady.
«Baıqaýdyń aldyńǵy kezeńderine Nur-Sultan jáne Almaty qalalarynyń, Pavlodar, Qyzylorda, Batys Qazaqstan, Túrkistan, Almaty, Jambyl jáne Aqtóbe oblystarynyń muǵalimderi qatysty. Búgingi kúni olardyń bir bóligi kadr tapshylyǵy bar nemese bilim sapasy salystyrmaly túrde tómen aımaqtardaǵy mektepterde jumys isteıdi. Mektepterde bilikti muǵalimderdiń kóbeıýi sapany arttyrýǵa oń áser etedi. Balalarǵa óz bilimin bólisý úshin basqa óńirge birge kóship jatqan muǵalim erli-zaıyptylar da bar», – deıdi QR Oqý-aǵartý mınıstrliginiń Orta bilim komıtetiniń tóraǵasy Gúlmıra Kárimova.
Konkýrstan ótken muǵalimdermen eńbek sharty 5 jylǵa jasalatynyn aıta keteıik. Tórt oblystyń birine qonys aýdarǵan muǵalimderdiń balalary balabaqsha men orta mektepterden oryn alady.
Konkýrsqa turǵylyqty jerine qaramastan, tıisti beıini boıynsha joǵary pedagogıkalyq, joǵary kásiptik jáne (nemese) joǵary oqý ornynan keıingi bilimi bar elimizdiń pedagogteri qatysa alady. Iaǵnı joǵary jáne (nemese) joǵary oqý ornynan keıingi bilim berý uıymdarynda pedagogıkalyq qaıta daıarlaýdan ótkender, sondaı-aq «pedagog-sarapshy», «pedagog-zertteýshi», «pedagog-sheber» biliktilik sanattary bar mamandar qatysa alady. Konkýrsqa sondaı-aq úlgerimniń ortasha baly (GPA) 3,5-ten tómen emes gýmanıtarlyq baǵyt boıynsha, úlgerimniń ortasha baly (GPA) 3,2-den tómen emes jaratylystaný-matematıkalyq baǵyt boıynsha joǵary oqý oryndarynyń pedagogıkalyq mamandyqtarynyń túlekteri, sondaı-aq pedagogıkalyq mamandyqtar boıynsha úlgerimniń ortasha baly (GPA) 3,4-ten tómen emes magıstratýra túlekteri qatysa alady.