Qazaqstan jasóspirimder quramasy Úndistannyń Nú-Delı qalasynda ótip jatqan Bille Jean King Cup by BNP Paribas (álem chempıonaty) irikteý saıysynyń shırek fınalyna shyqty
Jarystyń ekinshi kúni qazaqstandyqtar D tobynda Vetnam quramasyn oısyrata utty, dep habarlaıdy Almaty-akshamy.kz Olympic.kz-ke silteme jasap.
Birinshi bolyp Asyljan Arystanbekova Ngo Hongpen sheberlik baıqasty. Toǵyzynshy geımde qazaqstandyq tenısshi breık jasap, sosyn setke dop bergende, óz múmkindigin múlt jibergen joq – 6:4. Ekinshi sette Asyljan qarsylasyna bir ǵana geım ustatty – 6:1. Ekinshi machta Aııa Nupbaı Hýnh Ngokty tas-talqan etip jeńdi – 6:0, 6:3. Sodan keıin A.Arystanbekova Karına Jumadjanovamen birge juptyq synda 1 saǵat 45 mınýtta Ngo Hong pen Hýnh Ngokty tize búktirdi – 6:4, 4:6, 10:5.
Osylaısha Vetnam quramasyn 3:0 esebimen utqan qazaqstandyq qyzdar merziminen buryn irikteý saıystarynyń shırek fınalyna joldama aldy. Erteń Qazaqstan quramasy Sıngapýrmen oınaıdy. Bul mach el quramasy úshin eshteńe sheshpeıdi. Shırek fınal jerebesi erteń keshke tartylady. Fınaldyq kezeńge tek úsh komanda ǵana joldama alady.