Qazaqstandyq Iýlıa Pýtınseva juptyq synda Osaka (Japonıa) WTA 250 týrnıriniń fınalyna shyqty.
Qazaqstandyq tenısshi reseılik Anna Kalınskaıamen birge jartylaı fınalda jarystyń 2-raketkalary, kort ıeleri Erı Hodzýmı – Makoto Nınomıamen sheberlik baıqasty, dep habarlaıdy Almaty-akshamy.kz QazAqparatqa silteme jasap.
Bul mach Iý.Pýtınsevaǵa da, A.Kalınskaıaǵa da ońaıǵa túsken joq. Óıtkeni olar búgin osynyń aldynda jekeleı synda óner kórsetti.
Dúnıejúzilik reıtıńte 88-orynda turǵan Iýlıa Pýtınseva shırek fınalda úsh saǵatqa jýyq ýaqytqa sozylǵan tartysty básekede álemniń 39-raketkasy qytaılyq Sınúı Vanǵa jol berdi – 6:7 (4:7), 7:6 (7:1), 3:6. Al álemniń 92-raketkasy A.Kalınskaıa reıtıńte 123-satydaǵy AQSH ókili Eshlın Krúgerden oısyraı utyldy – 3:6, 1:6.
Bulardyń juptyq syndaǵy kezdesýi de shıelenispen ótti. Birinshi partıada taı-breıkte japonıalyq jup ábjildik tanytty – 7:6 (7:3). Ekinshi sette esep 5:3 bolǵan mezette olar machqa dop berdi. Mine, dál osy sátte jınala bilip, jankeshtilik tanytqan Pýtınseva men Kalınskaıa tarazy basyn teńestirip qana qoımaı, taı-breıkte aıqyn basymdylyq kórsetti – 7:6 (7:1). Sodan keıin sýper taı-breıkte jeńisti julyp aldy – 10:7.
Eki saǵat 9 mınýtqa sozylǵan báseke barysynda qazaqstandyq-reseılik jup 10 breık-poınttyń jeteýin múlt jibergen joq. Japonıalyq dýet 1 eıs, 7 breıkpen (7 breık-poınt) kózge tústi.
Osylaısha, qazaqstandyq tenısshi bir kúnde eki machta bes saǵat boıy oınady.
Iýlıa Pýtınseva men Anna Kalınskaıa fınalda germanıalyq Anna-Lena Frıdzam – ýkraınalyq Nadejda Kıchenokpen bas júldeni sarapqa salady.