Ál-Farabı atyndaǵy Qazaq ulttyq ýnıversıtetinde 1-kýrs bilimgerlerin «Stýdentter qataryna qabyldaý» saltanatty keshi ótti. Keshke memleket jáne qoǵam qaıratkerleri, belgili ǵalymdar, qalamgerler, kásipkerler, qarjygerler, jýrnalıser, blogerler, estrada juldyzdary arnaıy shaqyryldy.
Saltanatty sharaǵa sondaı-aq shetel dıplomatıalyq ókildikteri men konsýldyq mekeme basshylary, oqytýshy-professorlar qaýymy men bilim alýshy jastar qatysty, dep habarlaıdy Almaty-akshamy.kz.
Dástúrli mereke Ánurandy oryndaýmen bastaldy. 16 fakúltettiń ókilderi – ýnıversıtet tabaldyryǵyn jańa attaǵan jastar arnaıy sherýmen júrip ótti.
Saltanatty sharany ashqan Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev barsha qatysýshylardy jańa oqý jylynyń bastalýymen quttyqtady. Rektor Memleket basshysy Qasym-Jomart Toqaev Ulttyq quryltaıdyń bıylǵy otyrysynda sóılegen sózinde: «Ádiletti Qazaqstan» jáne «Adal azamat» uǵymdary el tiregi bolatyn egiz qundylyq retinde árdaıym qatar turýǵa tıis. Adal azamatqa tán qasıetter árbir jastyń boıynan tabylýy kerek. Ulttyń jańa bolmysy bilim, ǵylym jáne mádenıet salasyn damytý arqyly qalyptasady», – dep atap ótkenine aıryqsha toqtaldy.
«Bıyl ulttyń jańa bolmysyn qalyptastyrýǵa umtylǵan 7436 talapker QazUÝ-ǵa 1-kýrsqa qabyldandy. Onyń 4000-nan astamy memlekettik grant ıeleri. Birinshi kýrs stýdentteriniń arasynda 637 «Altyn belgi» ıegerleri men 267 úzdik oqýshy bar. Magıstratýraǵa – 1340, doktorantýraǵa 278 adam tústi», – dedi QazUÝ rektory. Joǵary oqý ornyna deıingi bilim berý fakúltetine 1098 adam qabyldandy. QazUÝ jańa oqý jylyna jalpy sany 10 152 adam qabyldady. Qazirgi tańda QazUÝ-da 25 myńǵa jýyq stýdent bar, onyń 2,5 myńǵa jýyǵy álemniń 50 elinen kelgen sheteldik stýdentter», – deı kele, rektor ýnıversıtet tarıhynyń mańyzdy kezeńderi men qyzmetiniń nátıjelerin de atap ótti.
Bıyl ýnıversıtette 36 jańa bilim baǵdarlamasy engizildi. Atap aıtsaq: «Aqparattyq jáne komýnıkasıalyq tehnologıalar», «Óner jáne gýmanıtarlyq ǵylymdar», «Densaýlyq saqtaý», «Jaratylystaný, matematıka jáne statısıka», «Mashına jasaý, óńdeý jáne qurylys salalary», «Pedagogıkalyq ǵylymdar».
Bıyl jazda Aqtaý qalasynda ótken ýnıversıadada QazUÝ sportshylary 39 altyn, 27 kúmis, 22 qola medalǵa qol jetkizip, kósh bastady. Qytaıdyń Chendý qalasynda ótken jazǵy ýnıversıada jarysynda da jas sportshylarymyz joǵary nátıjelerge qol jetkizdi.
Kelesi jyly ýnıversıtetimizdiń qurylǵanyna 90 jyl tolady. Ótken jyly Úkimet qaýlysymen QazUÝ-ǵa zertteý ýnıversıteti mártebesi berildi. Memleket basshysynyń qoldaýymen ýnıversıtet Ystambul jáne Bishkek qalalarynda óz fılıaldaryn ashty. QazUÝ-da ótken jyldan beri MIFI Ulttyq ıadrolyq zertteý ýnıversıtetiniń fılıaly jumys isteıdi. Qazir Qytaıdyń Soltústik-batys polıtehnıkalyq ýnıversıtetiniń fılıalyn ashý jumystary júrip jatyr. Qalashyq aýmaǵynda jańadan zamanaýı dámhanalar, ǵalamtor-kafeler, dúkender, kofehanalar men kóshirme ortalyqtary jumys isteıdi. Bıyl 4000 oryndyq jataqhananyń qurylysy bastalady.
Sóz sońynda rektor Janseıit Túımebaev saltanatty jaǵdaıda aqyl men parasatty, aqıqat pen bilimdi beıneleıtin «Bilim shyraǵyn» jaqty. Bul erekshe sátti «Damý» etno-djaz aspaptyq toby áserli áýenmen súıemeldedi.
Óz kezeginde Ál-Farabı atyndaǵy QazUÝ Dırektorlar keńesiniń tóraǵasy, Ál-Farabı atyndaǵy QazUÝ Túlekter qaýymdastyǵynyń tóraǵasy Qaırat Mámı quttyqtaý sóz sóılep, 1-kýrs stýdentterine tabys tiledi.
«Stýdentter qataryna qabyldaý» keshi erekshe ótip, shara konserttik baǵdarlamamen jalǵasty. Kórermender nazaryna qyzyqty oıyndar, pıksel jáne lazerlik shoý usynyldy. Sahnada tanymal jas oryndaýshy Malika Yes, «Aqbulaq» fólklorlyq ansambli, halyqaralyq baıqaýlardyń jeńimpazy Ǵalamat Beıseqojaev, belgili ánshi Seıfýllın Jolbarys, Muqasan Shahzadaev, Royals Live Band toby jáne basqa da estrada juldyzdary ánnen shashý shashty.
Merekede QazUÝ-dyń talantty ánshileri men kreatıvti jastary da óz ónerlerin pash etti. Zań fakúltetiniń stýdentteri «Gúl Almaty» shoýyn daıyndady. 30 sheteldik stýdent qytaı, koreı, ózbek, túrikmen, túrik halyq bılerin bılep, kópshilik yqylasyna bólendi. 140 stýdent «Salaýatty ómir salty» jobasynyń jarqyn tusaýkeserin usyndy. Stýdentterdiń «Bárimiz birge el úshin» qoıylymyn «Adal azamat» degen jazýmen aıaqtaǵany erekshe áserge bóledi.
Stýdentter merekesi fantasıkalyq lazerlik shoý men bı keshine ulasty.