Respýblıka shet memleketterge astyq, kómir, munaı ónimderin, tyńaıtqyshtar, hımıalyq jáne basqa da zattardy eksporttaıdy.
Qazaqstandyq teńiz porttary arqyly júk tasymaldaý kólemi eki esege artty. Máselen, ústimizdegi jyldyń birinshi toqsanynda Aqtaý aılaǵy arqyly bir mıllıon 200 myń tonnadan astam júk tasymaldanǵan, dep habarlaıdy Almaty-akshamy.kz Qazaqtv.com saıtyna silteme jasap.
Port jyl boıy barlyq túrdegi kemelerdi qabyldaıdy. Mundaǵy ashyq qoımalarda 2,5 myń konteıner saqtaýǵa bolady.
"Biz "Transkaspıı halyqaralyq kólik baǵyty" qaýymdastyǵyn qurdyq. Oǵan osy proseske qatysýshylardyń barlyǵy kiredi. Árıne, osy baǵyttyń tar tustaryn keńeıtemiz. Biz sıfrlandyrý, kedendik rásimderdi jeńildetý, jedeldetilgen prosester arqyly ótkizý qabiletin 20 prosentke deıin arttyra alamyz", - dedi Aqtaý Halyqaralyq teńiz saýda portynyń prezıdenti Abaı Túrikpenbaev.
Al Quryq portymen elimizge kólik, azyq-túlik, ónerkásiptik qural-jabdyqtar, qurylys materıaldary ımporttalady. Tranzıtpen elektronıka, toqyma, metal buıymdary ákelinedi. Mundaǵy ınfraqurylym avtomobıl jáne temirjol aılaqtarynan turady. Sońǵysynyń qýattylyǵy jylyna 4 mıllıon tonnaǵa jetedi. Eki aılaq bir mezette tórt paromǵa qyzmet kórsete alady. Júkter «bir tereze» qaǵıdaty boıynsha óńdeledi.
Serik Ahmetov, Quryq portynyń Bas dırektory:
– Ótken aıda tasymal kólemin úsh esege arttyrdyq. Bul avtokólik pen vagon sany úsh ese kóp degen sóz, nátıjesinde úsh ese kóp júk óńdeldi. Túrkıanyń búkil logıstıkasy avtokólikterge negizdelgen. Sondyqtan biz de eýrofýralarǵa arnap dáliz qurýǵa nazar aýdardyq.
Kóptegen halyqaralyq dálizderdiń taǵy bir quramdas bóligi Kaspıı teńiziniń shyǵys jaǵalaýynda ornalasqan. Aqtaý soltústik termınalynan júkter negizinen Iran, Reseı jáne Ázirbaıjan baǵyttaryna jóneltiledi.