Arnaıy is-sharalar kesheni engizildi.
Sý basý qaýpi bar aımaqtardan adamdardy evakýasıalaý úshin 1,6 myńnan astam temirjol vagony daıyndaldy. Bul týraly QR Úkimeti otyrysynda Indýstrıa jáne ınfraqurylymdyq damý mınıstri Qaıyrbek Óskenbaev málimdedi, dep habarlaıdy Almaty-akshamy.kz.
«Sý tasqyny qaýpiniń ýaqtyly aldyn alý jáne joıý, sondaı-aq poıyzdardyń úzdiksiz jáne qaýipsiz qozǵalysyn qamtamasyz etý maqsatynda QR IIDM temir joldardy sý tasqyny kezeńine daıyndaý boıynsha jumystar júrgizýde. Atap aıtqanda, «QTJ» UK buıryǵymen joldar men jol boıyndaǵy temirjol nysandaryn qorǵaý boıynsha arnaıy is-sharalar kesheni engizildi», - delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
Qazirgi ýaqytta kópirler, qubyrlar men drenajdyq qudyqtardyń tesikterin qar men muzdan tazartý, sondaı-aq taý jáne sý burǵysh aryqtardy, naýalar men kúvetterdi ashý boıynsha daıyndyq jumystary júrgizilýde. Mamandar sý qoımalary men agrotehnıkalyq bógetterdiń jaı-kúıin tekseredi, TJ boıynsha oblystyq bólimshelermen ózara is-qımyl algorıtmderi pysyqtaldy.
«Ótken jyldardyń tájirıbesin taldaý nátıjeleri boıynsha elimizdiń barlyq óńirlerinde 673 qaýipti oryndardyń tizbesi anyqtaldy, olardy aınalyp ótý joldary uıymdastyryldy. Jaýapty tulǵalar táýlik boıy kezekshilik etedi. Tasqyn sý ótken jaǵdaıda sý basý aımaǵynan azamattardy evakýasıalaý úshin lokomotıvter jáne 1,6 myńnan astam vagon daıyndaldy. Arnaıy tehnıkalar – krandar, traktorlar men búldozerler, 84 qalpyna keltirý jáne órt sóndirý poıyzdarynyń daıyndyǵy turaqty», - dep habarlady Q.Óskenbaev.
Mınıstrdiń aqparaty boıynsha, joldar men temirjol qurylystaryn qorǵaý úshin 2 550 tekshe metr kesek tas jáne 9 myń kondısıalyq emes temir-beton shpaldary daıyndalǵan. Tehnıka men materıaldardyń daıyndyǵy 100% quraıdy.