Eki jaqty kelisim aıasynda Qazaqstanda College Contributor initiative pılottyq baǵdarlamasy iske qosyldy
Qazaqstandyq stýdentter Amazon korporasıasynyń aýqymdy halyqaralyq jobasymen jumys isteýge múmkindik aldy. OpenSearch Amazon jobasy Ǵylym jáne joǵary bilim mınıstrligi men Amazon kompanıasy arasyndaǵy memorandým aıasynda júzege asady, dep habarlaıdy Almaty-akshamy.kz.
2022 jyldyń sońynda Ǵylym jáne joǵary bilim mınıstrligi men Amazon kompanıasy arasynda Joǵary bilim berý salasyndaǵy perspektıvalyq yntymaqtastyq, stýdentterdiń oqý prosesinde ınovasıalardy engizý jáne mansabyn bastaý úshin qajetti daǵdylardy ıgerý múmkindikterin keńeıtý týraly Memorandýmǵa qol qoıylǵan bolatyn.
Eki jaqty kelisim aıasynda Qazaqstanda College Contributor initiative pılottyq baǵdarlamasy iske qosyldy. Endi elimizdiń JOO stýdentteri Amazon kompanıasynyń halyqaralyq aýdıtorıasy arasynda birinshi bolyp OpenSearch Amazon ashyq bastapqy kody bar jobamen jumys isteýge qatysady.
Elimizdegi tehnıkalyq ýnıversıtetterde oqıtyn 100-den astam úzdik stýdent Amazon korporasıasynyń aldyńǵy qatarly jobasyna tikeleı qatysýǵa múmkindik alady. Aqparattyq tehnologıalar mamandyǵynda bilim alatyn qazaqstandyq stýdentter úsh aı boıy Amazon kompanıasy mamandarynyń jetekshiligimen OpenSearch boıynsha tájirıbelik jumystar júrgizip, derekter repozıtorııleriniń keń baǵyty boıynsha bastapqy kodqa ózgerister men jaqsartýlar engizedi.
Baǵdarlama stýdentterdiń óz portfolıosyna halyqaralyq jobalarda jumys isteý boıynsha trek rekordyn (basqarý nátıjelerin) jasaýǵa, Amazon kompanıasynyń mamandarymen tıimdi baılanys ornatýǵa múmkindik beredi.
OpenSearch jobasy aıasynda stýdentterge óz jumystaryna tolyq taldaý túrindegi esep beriledi. Sondaı-aq, korporasıa tálimgerlerinen usynymdar men pikirler tyńdap, bolashaqta Amazon kompanıasynda taǵylymdamadan ótýge, tipti jumysqa ornalasýǵa múmkindik alady.
Budan bólek, Amazon kompanıasy OpenSearch Amazon pılottyq jobasyn Qazaqstanda iske asyrý arqyly basqa elderden stýdentter tartyp, órisin keńeıtýge nıetti.