40 mlrd teńge sýbsıdıa is júzinde dalaǵa ketken.
Sybaılas jemqorlyqqa qarsy qyzmet búgingi kúni aýyl sharýashylyǵyn damytýǵa bólingen sýbsıdıalardy jymqyrý faktileri boıynsha 109 sotqa deıingi tergeýdi ashty, dep habarlaıdy Almaty-akshamy.kz Eldala.kz silteme jasap.
Mamandardyń aıtýynsha, 73 adam kúdikti dep tanyldy, onyń 37 laýazymdy jáne olarǵa teńestirilgen adamdar bolyp tabylady. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti habarlap otyr.
Vedomstvonyń málimetinshe, atalǵan ister boıynsha túrli deńgeıdegi 23 basshy ótip jatyr. Olardyń qatarynda ASHM Mal sharýashylyǵy departamenti basshysynyń mindetin atqarýshy, oblystyq aýyl sharýashylyǵy basqarmalarynyń tórt basshysy jáne olardyń tórt orynbasary, aýdandyq aýyl sharýashylyǵy bólimderiniń basshylary men olardyń orynbasarlary, oblystyq aýmaqtyq ınspeksıa men aýdandyq veterınarlyq qyzmet ókilderi.
«Jalpy, agenttik sýbsıdıalaý salasyn taldaý kezinde qoldanǵan tásil sybaılas jemqorlyq sqemalaryn anyqtaýda jáne joıýda óziniń tıimdiligin kórsetti jáne agrarshylardyń ózderiniń arasynda oń pikirge ıe boldy. Bul rette agenttik Tóraǵasy sýbsıdıalaý salasyndaǵy zańnamada ASHM men oblys ákimdikteriniń basshylyǵyn qosa alǵanda, joǵary laýazymdy sheneýnikterdiń jaýapkershiligi bulyńǵyr ekenin birneshe ret atap ótken. Osyǵan baılanysty olardyń qylmystarǵa qatystylyǵyn anyqtaý qıyn. Sondyqtan agenttik ázirlenip jatqan sýbsıdıalaý qaǵıdalarynda olardyń jaýapkershiligin derbestendirý boıynsha usynystar engizdi», - dep málimdedi Sybaılas jemqorlyqqa qarsy is-qımyl agenttiginde.
Buǵan deıin agenttik aýyl sharýashylyǵyn sýbsıdıalaý salasyn taldaý barysynda jemqorlardyń qaltasyna qarajat túsetin birneshe turaqty sqemany ashqan bolatyn. Máselen, para alǵan veterınarlyq baqylaý komıteti qyzmetkerleriniń qatysýymen mal eksportqa moratorıı kezeńinde shetelge eksporttalǵan.
Sondaı-aq UAǴBO ákimshilendiretin ASJ bazasyna durys emes derekterdi engizý arqyly aýyl sharýashylyǵy janýarlarynyń jasy men jynysy túzetilip, eseptik derekter qaıtalandy. Nátıjesinde joq malǵa sýbsıdıa berilgen nemese eki ret sol malǵa sýbsıdıa berilgen.
Jaıylymdardy sýlandyrý úshin kún panelderin jetkizýde taǵy bir sqema qoldanyldy. Jumys istemeıtin jabdyq joǵary baǵamen satyp alynǵan, keıinnen ol paıdalanylmaǵan, al 40 mlrd teńge sýbsıdıa is júzinde dalaǵa ketken.