Erkin kúresten álem chempıonatynda Qazaqstandyq palýandar jeńiske jetti
Bishkekte estý qabileti zaqymdanǵan sportshylar arasynda erkin kúresten álem chempıonaty óz máresine jetti. Jarys eresekter, jastar jáne kadetter arasynda ótti. Baıraqty básekede qazaqstandyq palýandar qorjynǵa 6 «altyn», 10 «kúmis» jáne 4 «qola» medaldi saldy, dep habarlaıdy Almaty-akshamy.kz.
Eresekter arasynda qazaqstandyq palýandar 1 «altyn», 4 «kúmis» jáne 2 «qolaǵa» qol jetkizip, komandalyq esepte 3-shi oryndy mise tutty. Sonymen, Pernesh Shadıar (70 kg) altynnan alqa taqsa, Bókeev Nurmahan (57 kg), Jaqsylyq Dosymjan (65 kg), Áldibaev Shyńǵysqan (86 kg), Shonký Haırathaan (125 kg) kúmiske qol jetkizdi. Al Turǵynbaı Ǵasyr (74 kg) men Rsaly Sabyrjan (79 kg) qolaǵa qanaǵat etti.
Jastar arasynda palýandarymyz komandalyq esepte birinshi orynǵa kóterildi. Bul sanattaǵa palýandardyń enshisinde 1 «altyn», 4 «kúmis» jáne 2 «qola» medal. Sonymen Samarın Andeı (65 kg) tuǵyr bıigine kóterilip, altyn medaldi taqty. Al Moldaǵalı Nurhan (57 kg), Ýrazbaev Kamıl (70 kg), Ázı Ramazan (86 kg), Jangabýlov Iskander (74 kg) kúmis medaldi ensheledi. Amangeldi Raıymbek (79 kg) pen Borodın Konstantın (97 kg) qolaǵa qol jetkizdi.
Kadetter arasynda 4 «altyn» jáne 2 «kúmis» medaldi enshilegen Qazaqstan quramasy komandalyq esepte 1-shi orynǵa ıe boldy. Askar Daryn (48 kg), Kamıden Rýstem (51 kg), Salkınbek Eldar (55 kg), Myrzahmet Nyshanbek (60 kg) altynǵa qol jetkizip, el ánuranyn oryndatty. Munan keıin marapattaý tuǵyrynda Sholpanbaı Dýlat (65 kg) Jylqyshybaı Aıqyn (71 kg) kúmis medal taǵyp, komandanyń abyroıyn asyrdy.
Aıta ketsek, Bishkekte estý qabileti zaqymdanǵan sportshylar arasynda erkin kúresten álem chempıonaty 7-11 qyrkúıek aralyǵynda ótti. Jarysqa 16 memleketten 300-den astam sportshy qatysty.