Jeti kýbokty jeńip aldy.
Bakýde ótken SAF-2022 robot-tehnıka festıvalinde qazaqstandyq oqýshylar jeńis tuǵyrynan kórindi. Bul súıinshi habardy Baǵdat Mýsın óziniń Telegram arnasynda jazdy, dep habarlaıdy Almaty-akshamy.kz.
Aýqymdy festıválge 350 komanda, 1300 qatysýshy, 8 memleket (Ázirbaıjan, Túrikmenstan, Estonıa, Shvesıa, Ulybrıtanıa, Ózbekstan, Túrkıa) qatysty. Qazaqstandyqtar túrli marapattar men júldeli oryndarǵa ıe boldy.
Halyqaralyq baqylaýshylar komandalardyń óner kórsetý deńgeıin joǵary baǵalady. Otandastarymyz Vex Robotics Competition salasy boıynsha ótken básekede basymdyq tanytyp, negizgi 7 kýbokty jeńip aldy.
Jasóspirimder sanatynda 1729X NEW EMPIRE komandasy birlesken jarysta 2-shi oryndy, al, jeke dara saıysta 3-shi oryndy ıelendi. Al, 1729K LSF qazaqstandyq jasóspirimder toby komandalyq jumysta 3-shi orynǵa, sondaı-aq jeke dara jarysta 2-shi orynǵa turaqtady.
Jarystyń sheshýshi kezeńderine 3 komanda qatysyp, barlyǵy da márege shyqty. Joǵary synyp oqýshylary komandalyq jáne jeke sanattaǵy básekede birinshi orynǵa ıe boldy.
Aıta ketsek, Sátbaev atyndaǵy ýnıversıtet stýdentterge tehnıkalyq qoldaý kórsetti, oqýshylardyń jol júrý shyǵyndary qatysýshylardyń otbasylary esebinen óteldi.
«Oqýshylarymyzdyń osyndaı jetistikteri barshamyzǵa qýanysh syılaıdy. Olardy shyn júrekten jeńisterimen quttyqtaımyn! Keleshekte daryndy jastar bilimderi men sheberlikterin shyńdap, elimizdiń ıgiligi úshin eńbek etetinine senimdimin. Balalardy álemdik jarysqa daıyndaýǵa qoldaý kórsetken - Satbayev University men Halyqaralyq robot-tehnıka akademıasyna alǵysymdy bildiremin», - dep jazdy mınıstr.