Qabyldaý ǵımaraty jańa sanıtarlyq erejelerge, trıaj aımaǵynyń normalaryna sáıkes keledi
Búgin №7 qalalyq klınıkalyq aýrýhanada operasıalyq bólimshesi bar qabyldaý bóliminiń jańa ǵımaraty ashyldy. Oǵan Almaty qalasy qoǵamdyq densaýlyq saqtaý basqarmasynyń basshysy Iran Shámetekov qatysty, dep habarlaıdy Almaty-akshamy.kz.
Almaty qalasy Qoǵamdyq densaýlyq saqtaý basqarmasynyń baspasóz qyzmetiniń málimetinshe, jańa qabyldaý bólimi shamamen 2 000 sharshy metr aýmaqty qamtıdy (eski qabyldaý bóliminiń aýmaǵy 1 264 sh.m. bolǵan).
«Eger eski qabyldaý bólimi táýligine 300 naýqas qabyldasa, qazir bul kórsetkish 500 adamǵa deıin ósti. Qabyldaý bóliminiń qyzmetkerleri jylyna 100 000 naýqasqa táýlik boıy kómek kórsetetin bolady. Qabyldaý bólimi álemde qabyldanǵan eń joǵary zamanaýı standarttarǵa saı salynyp, jabdyqtalǵan. Atap aıtqanda, zamanaýı emdeý-dıagnostıkalyq qural-jabdyqtarmen onyń ishinde KT, rentgen apparaty, últradybystyq apparattar, beınefıbrogastroskop, anestezıa jáne tynys alý apparattarymen jáne t.b. jabdyqtalǵan. Odan bólek, operasıalyq bólmeler, jansaqtaý jáne qarqyndy terapıa bólimsheleri bar», - deıdi Iran Shámetekov.
Sondaı-aq munda avtonomdy jeldetý júıesi, bakterısıdtik súzgiler, operasıalyq bólimshege arnalǵan táýelsiz jeldetý júıeleri, jylytý jáne aýany baptaýy bar reanımasıa bólmeleri men qarqyndy terapıa bólimderi bar.
Jańa qabyldaý bóliminde pasıentter úshin maksımaldy yńǵaılylyq pen qupıalylyq úshin barlyǵy bar.
Jedel travmatologıa bólimshesine jeke kireberis bar, onda jol-kólik oqıǵasy, óndiristegi jazataıym oqıǵalar jáne t.b. saldarynan aýyr jaraqat alǵan kóptegen naýqasqa bir ýaqytta bilikti kómek kórsetiledi.
Qabyldaý ǵımaraty jańa sanıtarlyq erejelerge, trıaj aımaǵynyń normalaryna sáıkes keledi. Trıaj júıesine sáıkes qabyldaý bólimi qyzyl, sary jáne jasyl aımaqtarǵa bólinedi, olar tıisti tústi baǵyttaýyshtarmen belgilengen.
Sonymen qatar, bólimshe aýrýhananyń negizgi kireberisinen bólek, negizgi jolǵa jaqyn jáne jedel járdem kólikteriniń erkin kirýi jáne shyǵýy bar, múgedekter arbasyna arnalǵan pandýspen qamtamasyz etilgen ońaı qoljetimdi jerde ornalasqan.
Iran Maratuly atap ótkendeı, jańa 2023 jyly turǵyndardyń jaıaý júrý qashyqtyǵy aıasynda bilikti medısınalyq kómek alýy úshin medısınalyq uıymdardyń birqatar jańa nysandaryn ashý josparlanǵan. Máselen, jańa jyldyń birinshi toqsanynda Áýezov jáne Jetisý aýdandaryndaǵy «Mamyr» jáne «Kemel» otbasylyq dárigerlik ambýlatorıalaryn paıdalanýǵa berý, sondaı-aq Almaty qalasy Balalar jedel medısınalyq kómek kórsetý ortalyǵynyń keńeıtimin paıdalanýǵa berý josparlanǵan.