Qazaqstan quramasy 2025 jylǵy 10-17 mamyr aralyǵynda Reseıdiń Sochı qalasyndaǵy «Sırıýs» bilim berý ortalyǵynda ótken bıologıa páni boıynsha Ashyq halyqaralyq olımpıadada (Open International Biology Olympiad, OIBO) joǵary nátıje kórsetti.
14 elden jınalǵan jas bıologtar teorıalyq, jeke praktıkalyq jáne bıyl alǵash ret engizilgen jobalyq (toptyq) úsh kezeńde baq synady. Qazaqstan quramasy respýblıkalyq olımpıada jeńimpazdarynan jasaqtalyp, eki altyn, tórt kúmis medal jeńip aldy, sondaı-aq komandalyq jobalyq týrda da birinshi oryndy ıelendi.
Jeńimpazdar:
Batyr Erjanuly – 11-synyp, Nazarbaev Zıatkerlik mektebi, Shyǵys Qazaqstan oblysy;
Ersultan Qaıyrken – 10-synyp, «Bilim-ınnovasıa» lıseı-ınternaty, Pavlodar oblysy;
Álıhan Ashırhanov – 8-synyp, «Bilim-ınnovasıa» lıseı-ınternaty, Almaty qalasy;
Dmıtrıı Tıtkov – 10-synyp, №3 daryndy balalarǵa arnalǵan gımnazıa, Pavlodar oblysy;
Álimuhammed Samatuly – 9-synyp, «Bilim-ınnovasıa» lıseı-ınternaty, Pavlodar oblysy;
Egor Mengýlov – 10-synyp, №8 orta mektep, Kókshetaý qalasy, Aqmola oblysy.
Qurama jetekshisi – Aıgúl Karkýlova, QR Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy dırektorynyń orynbasary.
OIBO halyqaralyq olımpıadasy oqýshylardyń bıologıa jáne bıotehnologıa salalaryndaǵy zamanaýı máselelerdi sheshýge degen qyzyǵýshylyǵyn arttyrýdy, ǵylymı kókjıekterin keńeıtýdi, óndiristik seriktestermen yntymaqtastyqty jáne halyqaralyq tájirıbe almasýdy damytýdy maqsat etedi.
Aıta keteıik, olımpıada aldynda Qazaqstan quramasy uıymdastyrýshylardyń shaqyrýymen «Sırıýs» ortalyǵy bazasynda on kúndik halyqaralyq oqý-jattyǵý jıyndarynan ótken bolatyn.