Shymkent qalalyq perınataldyq ortalyǵynda salmaǵy nebári 1 keli bolatyn sábıdiń júregine kúrdeli operasıa sátti jasaldy. Sábıdiń týǵanyna 45 kún tolǵan bolatyn.
25-aptada dúnıege kelgen náreste naýryz aıynyń basynda ortalyqtyń jańa týǵan balalardyń qaruyndy terapıa bólimshesine jetkizildi. Onyń salmaǵy nebári 655 gram, boıy – 28 santımetr boldy. Zerttep-qaraý nátıjesinde dárigerler «ashyq arterıalyq ózek» (týa bitken júrek aqaýy) dıagnozyn qoıyp, oǵan qosa respıratorlyq dıstress-sındromdy anyqtady.
Sábıdiń jaǵdaıy asa aýyr bolǵandyqtan, ol birden ókpeni jasandy jeldetý apparatyna qosyldy. Dıagnozdyń kúrdeliligine baılanysty perınataldyq ortalyqtyń dárigerleri birneshe ret qaladaǵy kardıohırýrgtarmen keńesti.
Sábıge 45 kún tolyp, salmaǵy 1 kelige jetkende, dárigerler júregine operasıa jasaý týraly sheshim qabyldady. Ashyq arterıalyq ózekke jasalǵan kúrdeli jáne asa dáldikti qajet etetin bul operasıa sátti ótti.
Operasıany Shymkent qalalyq balalar klınıkalyq aýrýhanasynyń kardıohırýrgi Asan Jumanov pen Shymkent qalalyq perınataldyq ortalyǵynyń anestezıolog-reanımatology Aqjol Ábdiraıymov jasady.
Qazirgi tańda sábıdiń jaǵdaıy turaqty aýyr. Ol perınataldyq ortalyqtyń bas dárigeriniń neonataldyq qyzmet jónindegi orynbasary Gúlmıra Býdýkova men neonatolog-reanımatolog Erasyl Shábetov bastaǵan neonataldyq reanımasıa bólimshesi dárigerleriniń turaqty baqylaýynda.