Almatylyq jas kásipker bastaǵan top mobıldi qosymsha oılap tapty.
Oǵan AQSH tarapy qyzyǵýshylyq bildirip otyr. Onlaın alań kólik ıeleri men birge avtosheberler úshin ázirlengen, dep habarlaıdy Almaty-akshamy.kz
Joba joldaǵy kez kelgen kútpegen jaǵdaıdy jedel sheshýge baǵyttalǵan. Máselen, elektrondy tuǵyrnama arqyly temir tulpar dóńgelegin aýystyrý syndy túrli kólik aqaýlaryn qalpyna keltirý úshin evakýatordy nemese elektromehanıkti shaqyrýǵa bolady.
«Qazir biz josparlaǵan maqsattarǵa jetý úshin jumys jasap jatyrmyz. Jobany shilde aıynyń sońyna deıin iske qosyp, bıznesti bastap ketý kerek. Qazir sońǵy pysyqtaýlar júrip jatyr. Jobamyzdy aldymen Kalıfornıa men Tehasta endirip, keıin Los-Andjeles naryǵyn baǵyndyrý kózdelgen», - deıdi mobıldi qosymsha avtory Baǵlan Oljabaev.
Komanda qosymshany úsh jyl boıy 2017 den 2020 jylǵa deıin ázirledi. Bolashaqta ony birqatar jańa fýnksıamen tolyqtyrý kózdelýde. Jaqyn ýaqytta onlaın keńes berý qyzmeti qosylmaq. Iaǵnı, júrgizýshi kenetten syr bergen temir tulparyn arnaıy tehstansıalarǵa súıremeı-aq, sheberlerdiń qashyqtan bergen nusqaýlyqtaryna súıenip ózdiginen jóndeı alatyn bolady.
«Uıaly qosymshaǵa kirip, bas paraqshanyń ústińgi jaǵyndaǵy storısterge basasyz. Ol jerde kólikti jóndeý aqysyn baǵalaý fýnksıasy qarastyrylǵan, 30 sekýndtyq vıdeoǵa nemese fotoǵa túsirýge múmkindik bar. Túsirip, sheberge jiberesiz. Olar qarap, baǵalap, qansha ýaqyt qajet ekenin aıtady. Al tómengi jaǵynda sheberdi shaqyrý fýnksıasy bar. Qaı jerde júrseńiz de, ol kómekke keledi. Sondaı-aq, qarapaıym paıdalanýshynyń tabys tabý múmkindigi qarastyrylǵan. Mysaly, men avtokonserj nemese benzın jetkizý qyzmetin kórsete alamyn. Kóligim bolsa, kýrer bolýǵa bolady. Evakýator kóligim bolsa, sáıkes qyzmetter kórsetýge bolady», - deıdi mobıldi qosymsha avtory Baǵlan Oljabaev.
Aıta keteıik, búginde 6 myń avtokólik ıesi jáne 800 júz sheber mobıldi qosymshany belsendi paıdalanyp júr.