Bul týraly Ulttyq testileý ortalyǵynyń dırektory Rýslan Emelbaev áleýmettik jelidegi paraqshasynda jazdy.
Onyń aıtýynsha, ótken aptada testileý kezinde erejelerdi buzǵany úshin aýdıtorıadan barlyǵy 21 adam shyǵarylyp, olardyń nátıjeleri joıyldy, dep habarlaıdy Almaty-akshamy.kz
«Biz UBT-daǵy árbir joǵary nátıjeni tekseremiz», - dedi ol.
Sonymen qatar ol joǵary nátıje kórsetken talapkerlerdi qaıta baqylaý barysynda erekshe nazarǵa túsken testilenýshige toqtady.
«Test tapsyrýshy qańtar aıynda 7️2 bal, al negizgi UBT-da 1️30 bal jınaǵan. Nátıjesi birden 5️8 balǵa ósken, sondyqtan biz qosymsha kúsheıtilgen baqylaýdy ótkizýdi jón kórdik», - dedi ortalyq dırektory.
Beınejazbalardy tekserý barysynda talapkerdiń UBT erejelerin buzǵandyǵy belgili boldy. Ol testileý barysynda beınekamera men mınıqulaqqap qoldanǵan. Osyǵan jol bergen qyzmetshi testileýden shettetildi. Qyzmettik tekseris júrgizilip, tıisti shara qoldanylady. Al test tapsyrýshynyń nátıjeleri joıyldy. Endi ol ekinshi múmkindigin qoldana almaıdy.
«Dostar, júıeni aldaýǵa tyrysýdyń qajeti joq. Jaýapkershilikten eshkim qutyla almaıdy. Sizderdi taǵy da akademıalyq adaldyqty saqtaýǵa shaqyramyn. Al biz baqylaýdy odan ári kúsheıtetin bolamyz», - dep jazdy ol.