Bolgarıada kıokýshınkaı-kan jáne shınkıokýshınkaı-kan karateden jastar arasynda álem kýbogy ótti.
Jyl saıyn dástúrge aınalǵan básekege bıyl 22 eldiń 350-den astam tatamı sheberi jınaldy, dep habarlaıdy Almaty-akshamy.kz.
Qazaqstan ulttyq quramasynyń 45 ókili jarys bastalǵannan bastap-aq, joǵary nátıjeler kórsetip, júldeli oryndarǵa ıe boldy.
Naqtyraq aıtqanda, Qazaqstan quramasy jarystyń eki kúninde 23 altyn, 9 kúmis pen 12 qolaǵa qol jetkizdi.
Sonyń ishinde Nur-Sultan qalasynyń qurama komandasynyń qorjynynda 13 altyn, 6 kúmis júlde.
Qazirgi kezde álemdik arenalarda úzdik nátıje kórsetip júrgen elordalyq Anton Zımarev, Maqsat Iskakov jáne Rahat Janǵabylovtar osy joly da Ánuranymyzdy asqaqtatyp, kók Týymyzdy jelbiretti.
Qazaqstan quramasy álem kýbogyna osymen 5-shi ret qatysty. Karateshilerdiń eń úzdik nátıjesi 2019 jyly 9 altyn, 17 kúmis, 22 qolamen tirkelgen bolatyn.
Al bıyl Qazaqstan quramasy álem kýbogynda jalpy komandalyq esepte birinshi oryndy jeńip aldy.
Osylaısha, 22 memleketten sýyrylyp shyǵyp, qazaqstandyq karateshiler álemdik rekord ornatty.
Aıta keteıik, álem chempıonatynda top jarǵan sportshylar Nursultan Nazarbaev halyqaralyq áýejaıyna 12 shildede 07:55-te qonady.