2022 jyldyń 21 qazanynda Qazaq Geophysics kompanıasy Pert (Avstralıa) qalasynyń mańyndaǵy aýmaqta aerogeofızıkalyq zertteýlerdi bastady.
Aerogeofızıkalyq jumystar MobileMT tehnologıasy boıynsha mobılızasıalanǵan aspaly júıesi bar jeńil kópmaqsatty Eurocopter tikushaǵynyń kómegimen júrgizilip jatyr, dep habarlaıdy Almaty-akshamy.kz QazAqparatqa silteme jasap.
Ushaq shamamen 150 metr bıiktikten 1500 metrge deıingi tereńdikti zerttep, paıdaly qazbalardyń (altyn, mys, polımetal jáne KSSH) oshaqtaryn izdeıdi.
Atalǵan MobileMT tehnologıasy Jezqazǵan, Aqmola jáne Shyǵys Qazaqstan oblystarynda ken oryndaryn tabýǵa kómektesken bolatyn. Sondyqtan óz kezeginde elimizdegi taý-ken óndirýshi kompanıalardyń qorlarynyń artyp, damýyna septigin tıgizetini anyq.
Joǵary bilikti mamandary jáne ınovasıalyq geofızıkalyq qurylǵylary bar bul kompanıa Qazaqstan aýmaǵyndaǵy geologıalyq barlaý jumystaryn sátti júrgizip jatyr. Az ýaqytta ol shetel naryǵynda úlken suranysqa ıe boldy.
Qazaq Geophysics qajetti aımaqtardy anyqtaý úshin geofızıkalyq derekter jınaýǵa jáne olardy aýqymdyraq jumystarǵa, burǵylaýǵa daıyndaý úshin Batys Avstralıanyń úsh aýmaǵyn ushaqpen zerttep shyqpaq.
«Bul tehnologıanyń tıimdiligi bizdiń Kanada jáne Latyn Amerıkasyndaǵy seriktesterimizdiń jumysynan baıqaldy, ótken jyly onyń múmkindigin óz elimizde de kórdik. Avstralıa naryǵynda álemdik deńgeıde tanymal kompanıalarmen birge jumys isteý biz úshin úlken jetistik. Osyndaı iri jobalardy júzege asyrý úshin óz mamandarymyzdy eń úzdik tehnologıalarǵa úırettik. Sondaı aq bul jobaǵa MobileMT qurastyrýshylaryn, Qazaqstanda jumys istep júrgen kanadalyq Expert Geophysics kompanıasyn da tarttyq», - dedi Qazaq Geophysics Bas dırektory Ǵalym Nurjanov.
Ǵ.Nurjanovtyń aıtýynsha, mundaı tehnologıalardy qoldanǵannan keıin tapsyrys berýshiler barlaý jumystarynan oń nátıjelerge qol jetkizedi, sodan soń Australian Securities Exchange (AXS) qor bırjasyndaǵy aksıalardyń da birneshe esege ósýine yqpal etedi.
Joba barlyq túsindirme jumystaryn eseptegende Avstralıada osy jyldyń aıaǵyna deıin júzege asady.
2023 jyly Qazaq Geophysics elektro jáne magnıtobarlaý kólemi 21 000 esepti shaqyrym, 30 000 esepti shaqyrym aerogeofızıkalyq zertteýlerdi jáne shamamen jerasty taý qazbalarynyń 7 mln sh.m. 3D túsirilimin quraıtyn 10-nan asa jobaǵa qatyspaq.
Aıta keteıik, Qazaq Geophysics 2021 jyldyń mamyrynda quryldy. Kompanıa aerogeofızıka, jerústi geofızıka (magnıtobarlaý, elektrobarlaý) salalaryndaǵy eń zamanaýı qurylǵylardy jáne jerasty taý qazbalarynyń 3D túsirilimderin qoldaný arqyly, geofızıkalyq jumystar keshenin oryndaıdy. Bul mindetterdi oryndaý úshin Qazaq Geophysics-te joǵary bilikti mamandardan quralǵan shtat, óziniń avıasıalyq parki (tikushaqtar, ushaqtar, kvadrokopterler, ushqyshsyz ushý apparaty), sondaı-aq mamandandyrylǵan jáne qosymsha tehnıkalary bar. Bıylǵy jyly Qazaqstannyń bes oblysynda aerogeofızıkalyq zertteýler júrgizdi.