Baıqaýǵa 109 án kelip tústi.
Respýblıka kúni qarsańynda elordada Balalar jylyna oraı «Qazaqstan» teleradıokorporasıasy jarıalaǵan «Baldáýren» balalarǵa arnalǵan ánder baıqaýynyń jeńimpazdaryn marapattaý rásimi ótti, dep habarlaıdy Almaty-akshamy.kz Elorda.info-ǵa silteme jasap.
İs-sharaǵa depýtattar, qoǵam qaıratkerleri, BAQ ókilderi jáne elordalyq mektep oqýshylary men ata-analar qatysty.
2022 jyldyń basynda jarıalanǵan baıqaýǵa elimizdiń barlyq aımaǵynan 60-qa jýyq avtordan 109 án kelip tústi. Qazylar alqasynyń sheshimi boıynsha, 109 ánniń arasynan Sulýshash Sultanovanyń «Qýyrshaǵym» (sózi Ǵaını Daýylbaeva), Dýman Baıtileýovtiń «Jaý, jańbyr!» (sózi Baýyrjan Erman), Ushqyn Jamalbektiń «Balapanym» (sózi Aıtbek Tursynbaı), Bekjigit Serdáliniń «Áńgelek» (sózi Sabyrhan Asanov) jáne Altyn Mahanbetovanyń «Kókoraı kóktem» (sózi Ábdirahman Asylbekov) ánderi úzdik dep tanyldy.
- «Baldáýren» baıqaýyn ótkizýdegi basty maqsatymyz – balalar ánderiniń kóbeıýine úles qosý. Sebebi, elimizde balalardyń oryndaýyna laıyqtalǵan ánder óte az. Sondyqtan da balapandarymyz orys, aǵylshyn tilindegi ándermen ósip keledi. Biz bıyl 4 myń bala qatysqan «Qazaqstan daýysy. Balalar» televızıalyq jobasyn ótkizgen kezde, osy máseleni qatty sezindik. Kórermender tarapynan kóptegen syn aıtyldy. Shyn máninde aıtylǵan árbir synnyń astarynda shyndyq bar. Osydan keıin, oılana kele Balalar jylynda balalar shyǵarmashylyǵyna tartýymyz bolsyn dep ánder baıqaýyn jarıaladyq. Úzdik shyqqan 5 ánge «Qazaqstan» teleradıokorporasıasy arnaıy beınebaıadar túsirdi. Bul klıpter jaqynda «Qazaqstan» jáne «Balapan» arnalarynyń efırinen kórsetile bastaıdy, - dedi Basqarma tóraıymy Lázzat Tanysbaı.
Basqarma tóraıymy baıqaýǵa qatysýshylarǵa alǵys bildirip, «úzdikter qataryna qosylmaǵan qalǵan 100 án bolashaqta balalardyń oryndaýynda jaryqqa shyǵyp, ár úıde jáne úlken sahnalarda shyrqalatynyna senemiz», - dedi.
Jeńimpazdardy korporasıanyń Kórkemdik keńesinen bólek, arnaıy qurylǵan qazylar alqasy iriktedi. Qazylar alqasynyń quramynda memlekettik syılyqtyń laýreaty, Qazaqstan Jazýshylar odaǵynyń tóraǵasy Ulyqbek Esdáýlet, kompozıtor, QR Kompozıtorlary odaǵynyń tóraǵasy Serik Ábdinurov, kompozıtor, mýzykant Hamıt Shanǵalıev jáne balalar aqyny, jýrnalıs Serikbol Hasan bar.
Aıta keterligi, balalarǵan arnalǵan ánder baıqaýy táýelsiz Qazaqstan tarıhynda tuńǵysh ret uıymdastyryldy. Ótinim joldaǵandar arasynda elimizge tanymal kásibı kompozıtorlarmen qatar jańa avtorlar da boldy.