Otandyq dızaıner etnıkalyq stılde pishilgen kóılektermen sheteldi baǵyndyryp júr.
Etnıkalyq stıldegi qalyńdyqtyń saltanatty kóılekterin piship júrgen Anastasıa Romanovanyń ár ýaqyty sanaýly, ár kúni baǵaly. Qyrkúıek aıynda otandyq dızaıner Italıanyń Mılan qalasyndaǵy shoýǵa, al odan buryn Túrkıada 20 kıim úlgisinen qurylǵan jeke toptamasyn usynady, dep habarlaıdy Almaty-akshamy.kz
Ulttyq naqyshtaǵy alǵashqy kóılegin ol osydan 6 jyl buryn dúnıege ákelgen.
«Men kıim úlgileriniń óz boıyna ulttyq naqysh pen zamanaýı sán úlgisin úılestirgen erekshe mánerde bolǵanyn qaladym. Sondyqtan jumystarymyz Qazaqstan naryǵynda usynǵan ózge úlgilerden erekshelenip turady», - deıdi qalyńdyq kóılekteriniń dızaıneri Anastasıa Romanova.
Sheber velúr jáne barqyt sıaqty tyǵyz matalarmen jumys isteýden bas tartqan. Kıim úlgisi tapsyrys berýshiniń talǵamyna saı jasalady. Iaǵnı, ózgede kezikpeıtin, qaıtalanbas dara úlgide bolady. Olardyń birinde názik qyzdarǵa arnalǵan «qalyńdyqtyń tasy» dep atalyp ketken raýshan kvarsyn keziktirseńiz, endi biri ózine senimdi sánqoılardyń talǵamynan shyǵatyn ásem nefrıtpen bezendirilgen. Bundaı kıim úlgilerine tapsyrys el ishimen qatar shet memleketterden jıi túsip jatady.
Kózdiń jaýyn alatyn qazynaly qazaq mádenıeti óziniń biregeıligimen álemdi ózine baýrap aldy. AQSH, Reseı, Fransıa tipti Ońtústik Afrıka syndy alys syrt memleketter qazaqstandyq zerger Georgıı Marınıchenkonyń erekshe jumystarymen jaqsy tanys. Jańa etnıkalyq baǵytta jasalatyn áshekeı buıymdary keńge tanymal. Sheber tek Qazaqstan aýmaǵynan tabylǵan baǵaly tastardy zamanaýı quraldardyń kómeginsiz dástúrli túrde qolmen óńdeıdi.
«Men bizdiń jańa etnıkalyq buıymdardy jasaýǵa den qoıamyn. Baı mádenıetimizdi shetelge tanytý úshin olardy Germanıa, Amerıka syndy elderdegi kórmelerge shyǵarǵym keledi. Otandastarymdy jaqsy túsiný úshin qazir qazaq tilin meńgerýdi qolǵa aldym»,- deıdi zerger Georgıı Marınıchenko.
.