QR Qarýly kúshteri Desanttyq-shabýyldaý áskerleriniń áskerı qyzmetshileri efreıtorlar Baljan Musataeva men Marjan Saıranova «QazÚndi-2024» oqý-jattyǵýy barysynda Gımalaı taý bókterinde kúrdeli sekirýlerdi oryndady.
Teńiz deńgeıinen 3200 metr bıiktik, aınala – taý kórinisteri, arqada – parashút, qarý-jaraq pen jabdyqtar, maqsat – jaýyngerlik tapsyrmany oryndaý. Osylaısha, qazaqstandyq desantshylar kásibı biliktilikteri men jaýyngerlik daıyndyqtaryn kórsetýde, dep habarlaıdy aqshamnews.kz Qorǵanys mınıstrligine silteme jasap.
Qazaqstan Respýblıkasy Qarýly kúshteri Desanttyq-shabýyldaý áskerleriniń parashútshiler toby «QazÚndi-2024» oqý-jattyǵýynda tapsyrmalardy áskerı kontıngent quramynda oryndaýda. Olardyń ishinde eki qyz – parashútshi-nusqaýshy efreıtor Baljan Musataeva men 61993 áskerı bólimi materıaldyq-tehnıkalyq qamtamasyz etý vzvodynyń sanıtarlyq nusqaýshysy efreıtor Marjan Saıranova da bar.
Bıik taýdaǵy kúrdeli ahýalda qyzdar shekteýli alańǵa parashútpen sekirip dál qonýdy oryndaýda jaqsy nátıje kórsetti.
– Dál sekirý – ádette teńiz deńgeıinen 1200-den 4000 metrge deıingi bıiktikten, jeke jáne toptasqan túrde, ártúrli tómendetý rejımderinde berik jáne basqarylatyn deńgeıleri bar «qanat» túrindegi arnaıy parashút júıesi arqyly oryndalady. Dál sekirý basqarylatyn parashúttermen birge paıda bolǵan eń kóne parashút sportynyń biri bolsa da, ol eń kúrdelisi, óıtkeni parashút júıeleri jańartylǵan saıyn alańnyń ólshemderi men ruqsat etilgen normalar ózgeredi. Efreıtor Musataeva ekeýmiz týra shektelgen alańnyń ortasyna qonamyz, – dedi efreıtor Marjan Saıranova.
Efreıtor Baljan Musataeva túrli parashút júıelerimen júzden asa sekirýdi oryndaǵan. Jýyrda ǵana baǵdarlamany aıaqtaǵannan keıin ol parashútshi-nusqaýshy ataǵyn aldy. Marjan Saıranova parashútpen sekirýdi endi bastaǵan. Bul onyń alǵashqy halyqaralyq jattyǵýy, degenmen parashút komandasynyń aǵa ofıseri podpolkovnık Erjan Tólepulynyń aıtýynsha, Marjan keremet nátıjelerge qol jetkizip júr.
Esterińizge sala keteıik, «QazÚndi – 2024» oqý-jattyǵýy 30 qyrkúıek pen 13 qazan aralyǵynda Úndistannyń soltústik bóligi Aýlı qalasynyń mańyndaǵy «Sýrá» oqý-jattyǵý ortalyǵynda ótkizilip jatyr. Buǵan Qurlyq áskerlerinen «Ońtústik» óńirlik qolbasshylyǵy men QR Qarýly kúshteriniń Desanttyq-shabýyldaý áskerleri áskerı qyzmetshileriniń quramynan jasaqtalǵan biriken rota qatysýda.
Oqý-jattyǵý barysynda eki kontıngenttiń áskerı qyzmetshileri taý daıyndyǵy tájirıbesimen bólisip, terorızmge qarsy qaýipsizdik boıynsha birlesken mindetterdi oryndaýda. Desant túsirý kezinde Qazaqstan Desanttyq-shabýyldaý áskerleriniń áskerı qyzmetshileri Úndi áriptesterimen birlesip, kúrdeli taýly jerlerde parashútpen sekirý jattyǵýlaryn oryndaý ústinde.