Qazaqstandyq bolattyń ıkemdilik qasıetteri joǵary.
Qazaq qurylys jáne sáýlet ǵylymı-zertteý jáne jobalaý ınstıtýtynyń ǵalymdary tot baspaıtyn bolat metalynyń kezekti zertteý jumystaryn sátti aıaqtady.
Indýstrıa jáne ınfraqurylymdyq damý mınıstrliginiń málimetinshe, ınstıtýttyń mamandary Brınell ádisi arqyly elimizde qurylysta qoldanylatyn konstrýksıalyq bolattyń beriktigin anyqtaǵan, dep habarlaıdy Almaty-akshamy.kz.
Zertteýdiń nátıjesinde Qazaqstanda óndiriletin bolat shıkizatynyń ıkemdilik qasıetteri baıqalyp, onyń hımıalyq quramy Eýrokod 1993 talaptaryna sáıkes bolyp shyqty.
Ǵylymı-zertteý barysynda qalyńdyǵy 8-20 mm bolatyn 7 túrli konstrýksıalyq bolattyń synamasy alynyp, tartyp (bir osti) synaýdyń túrli ádisteri, sondaı-aq Brınell ádisi arqyly beriktigin tekserý men aspapty basý tásili qoldanyldy. Buǵan qosa tegistelgen bolat materıalyna da salystyrmaly taldaý jasaldy.
Atalǵan ólshem ádisteri taý jynystarynyń, alúmını qorytpalarynyń sapalyǵyn anyqtaý úshin qoldanylatynyn aıta keteıik. Tutastaı alǵanda, Brınell ádisi kóptegen materıaldyń beriktik qasıetterin anyqtaýdyń ámbebap ádisi bolyp sanalady. Joǵaryda aıtylǵan zertteý nátıjeleri kórsetkendeı, qazaqstandyq bolattyń ıkemdilik qasıetteri tolyq dáleldendi.
Túıindeı kelgende, júrgizilgen synaq qorytyndysy óndiriste qoldanylatyn otandyq jáne reseılik bolattyń oń nátıjelerin kórsetti. Aldaǵy ýaqytta ǵalymdar bul metaldyń beriktigine baılanysty basqa da ádisterdi qoldanyp, baǵalaýdy josparlap otyr. Zertteý nátıjeleri konstrýksıalardy jobalaýdy retteıtin normatıvtik erejelerge engiziledi dep kózdelgen.