Máskeýde ótken «Chempıondar lıgasynda» Artýr Mýsıev birinshi oryn aldy.
17 qańtarda Máskeýde BetBoom «Chempıondar lıgasy» óz máresine jetti, dep habarlaıdy Almaty-akshamy.kz
Dúbirli dodaǵa Halyqaralyq Pıramıda konfederasıasynyń nusqasy boıynsha eń myqty 8 oıynshy qatysty. Bıylǵy maýsymda týrnırge Qazaqstan atynan Artýr Mýsıev qatysty. Ol tórt halyqaralyq dárejedegi sport sheberin jeńip, chempıon atandy.
Jankúıerler oıynnyń tikeleı translásıasyn tamashalady. Qazaqstandyq bılárdtyń jankúıerleri Artýr Mýsıevke zor qoldaý kórsetti.
«Bılárd - sheberlikti shyńdaıtyn oıyn. Asa dáldik qajet. Sál qıys kózdeseńiz, shar basqa jaqqa ketedi. Al dóp tússeńiz, utasyz. Sol dóp túsý úshin de eptilik pen qajyr-qaırat kerek. Sál ǵana bosańsyp qalsańyz, qarsylas urymtal tusty baǵyp turady. Sol úshin kúndelikti tańǵy 11-den keshki 6-ǵa deıin demalyssyz jattyqtym. Meniń qarsylastarym ońaı bolǵan joq, olardyń kópshiligi - álem chempıondary. Úlken qatelikke boı aldyrmaý úshin barymyzdy sala bildik», – dedi jeńimpaz Artýr Mýsıev.
«Bul týrnırdegi jeńisimdi úlken jetistik dep sanaımyn. Bılárd - óte paıdaly oıyn, buǵan óte dáldik kerek jáne urymtal sátti kútý qajet. Bılárd basqa sport túrlerine uqsamaıdy, tabandylyq pen tártipke baýlıdy», - dep aǵynan jaryldy sportshy.
Qazaqstandyq bılárd sheberi óz tájirıbesimen bólisip, jas sportshylarǵa aqyl-keńesin aıta ótti.
«Bılárdqa qushtar jastar kóp. Bir nárse anyq. Barlyǵy eńbektiń arqasynda bolady. Árdaıym jattyǵýlarǵa qatysyp, jattyqtyrýshymen birge daıyndalsańyz, nátıjesin kóresiz. Ol úshin ynta kerek. Sonda ǵana halyqaralyq jarystarda jeńiske jetesiz. Bul eldiń de abyroıy bolady», – dedi . Mýsıev.