Aýa raıynyń qolaısyzdyǵyna baılanysty qazir 4 óńirde eskertý jarıalandy
Aýa raıynyń qolaısyzdyǵyna baılanysty elimizdiń birqatar óńirlerinde eskertý jarıalandy, dep habarlaıdy Almaty-akshamy.kz Almaty.tv-ge silteme jasap.
Sınoptıkter el aýmaǵynyń basym bóliginde túnde úsik júrýi múmkin dep boljam aıtty. Qar men kóktaıǵaq kesirinen óńir-óńirde jol-kólik apattary jıilegen. Áýe reısteriniń keshigýine ne keıinge shegerilýine baılanysty da jolaýshylarǵa eskertý jasalyp jatyr.
Áýereısterdiń keshigýi, tipti baǵyt kestesiniń ózgerýi qys kezinde jıi bolyp jatady. «Air Astana» kompanıasy bıylǵy jyldyń 30-qazanynan bastap, kelesi jyldyń 25-naýryzyna deıin kúzgi-qysqy navıgasıaǵa kóshkenin habarlap, eskertý jasady. Osy aralyqta jumys jospar boıynsha júrgizilmeı qalsa, áýe kompanıa jolaýshylardyń quqyǵyn saqtaýǵa mindetteledi.
«Áýe kompanıa kesirinen keshigý nemese oryndalmaǵan jaǵdaıda jolaýshylardyń barlyq quqyǵyn saqtaýǵa tyrysady. Iaǵnı, árbir eki saǵat saıyn salqyndatylǵan sýsyn, ár tórt saǵattan soń ystyq taǵam, kúndiz 8-10 saǵat keıin jáne túnde 8 saǵat keıin qonaq úıge ornalastyrylady», – dedi «Air astana» áýe kompanıasynyń korporatıvtik komýnıkasıalar jónindegi menedjeri Tilek Ábdiraqymov.
Qar, jańbyr saldarynan kesheli beri sátsiz sapardyń jıileýi baıqalǵan. Bir ǵana Almaty qalasynda sońǵy táýlikte 160-tan astam jol apaty tirkelgen. 50-ge jýyq adam túrli dene jaraqatyn aldy, bireýi apat kezinde til tartpaı ketken. Qar men kóktaıǵaq saldarynan Qaraǵandy oblysynda da kesheli beri 50 jol-kólik oqıǵasy tirkeldi. Joldaǵy qaýipsizdik elordalyq tártip saqshylaryn da alańdatyp otyr.
«Astana qalasy aýmaǵynda 2 kúnde 200-den astam jol-kólik oqıǵasy tirkeldi. Saldarynan 3 adam túrli dene jaraqatyn alǵan. Jolda júrgizýshiler, jaıaý júrginshiler jol erejesin qatań saqtaýlaryńyzdy suraımyz», – dedi PD Ákimshilik polısıa basqarmasynyń bólim bastyǵy Baýyrjan Toqjumanov.
Al Qazgıdromet mamandary aldaǵy 3 kúnde elde jel kúsheıip, tuman, kóktaıǵaq bolatynyn eskertti. Soltústikte, shyǵysta kóktaıǵaq, ortalyqta qar jaýyp, jel kúsheımek.
«Atmosferalyq frontaldy Qazaqstannyń basym bóliginde aýa raıynyń turaqsyz sıpatyn anyqtaıdy. Qar jaýady. Tek elimizdiń ońtústik joǵary atmosferalyq qysym áserinen jaýyn jaýmaıdy. Qazaqstan boıynsha tuman, kóktaıǵaq, Soltústiktiń óńirdiń jartysynda burqasyn bolady. Respýblıka boıynsha temperatýralyq ózgerister kútiledi», – dedi ınjener - sınoptık Aqmaral Smaǵulova.
Aýa raıynyń qolaısyzdyǵyna baılanysty qazir 4 óńirde eskertý jarıalandy. Boljamǵa saı Túrkistan, Soltústik Qazaqstan, Batys Qazaqstan, Qyzylorda oblysynda tuman túsip, boran soǵady. El aýmaǵynyń basym bóliginde túnde úsik júrýi múmkin.