Eskertkish byltyr ashylǵan
Almaty ákimdigi byltyr Ybyraı Altynsarınge ornatylǵan eskertkish parametrleriniń sáıkes kelmeýine qatysty máselege túsinik berdi, dep habarlaıdy Almaty-akshamy.kz.
«Bul Almaty qalasyndaǵy 2021 jylda salynǵan 68 750 000 tg turatyn babamyzdyń eskertkishi. Qujat boıynsha bıiktigi 750 sm, shyn máninde – 527 sm. 223 sm aıyrmashylyqty aqshamen sanasaq qansha bolady eken?», - dep jazdy Facebook-paraqshasynda «Ádildik joly» respýblıkalyq qoǵamdyq birlestiginiń atqarýshy dırektory Dıdar Smaǵulov.
Onyń aıtýynsha, eskertkish tuǵyrynyń bıiktigi 350 sm, al shyn máninde – 177 sm. Eskertkishtiń ózi 400 sm bolýy tıis, ólshegende – 350 sm.
«Aıyrmashylyq nebári 223 sm bolǵanymen, materıaldardyń, sonyń ishinde kórkemdik úshin qoldanylatyn OSS-545 markaly qolanyń qymbattyǵyn eskerer bolsaq, teorıalyq turǵyda laıyqty soma shyǵyp tur», - dep jazdy ol.
Osyǵan baılanysty QazAqparat agenttigi qala ákimdigine saýal joldaǵan bolatyn.
Mynandaı jaýap aldyq: «Eskertkish QR Mádenıet jáne sport mınıstriniń 2020 jylǵy 28 sáýirdegi № 103 buıryǵymen bekitilgen monýmentaldy óner ǵımarattaryn ornatý qaǵıdalaryna sáıkes ornatyldy.
2021 jylǵy 12 tamyzda QR Mádenıet jáne sport mınıstrliginiń monýmentaldy óner ǵımarattaryn ornatý jónindegi komısıasynyń otyrysynda 3 eskızdik joba qaraldy. Nátıjesinde eskertkishtiń estetıkalyq kelbeti týraly keıbir eskertýlermen № 112200 eskızdik joba maquldandy.
Joǵaryda kórsetilgen eskertýlerdi nazarǵa ala otyryp, 2021 jyldyń qyrkúıeginde Almaty qalasynyń Tarıh jáne mádenıet eskertkishterin qorǵaý jónindegi komısıa Y. Altynsarınge ornatylǵan eskertkish janynda kóshpeli keńes ótkizdi. Eskertkishtiń aýqymy ǵımarattyń bıiktigine sáıkes kelmeýi saldarynan tuǵyrdyń kólemin 350 sm-den 165 sm-ge qysqartý týraly komısıalyq sheshim qabyldandy. Bul sheshim kóshpeli keńestiń hattamasynda tirkelgen. Iaǵnı, eskertkishtiń bıiktigi ózgergen joq, tuǵyr qysqardy.
Áleýmettik jelilerde eskertkishtiń bıiktigi 350 sm, al tuǵyrdyń bıiktigi 177 sm ekendigi kórsetilgen. Eskertkishti daıyndaý men ornatýdy «Aspantau Construstion» JSHS júzege asyrdy.
Avtorlardyń aqparatyna sáıkes, eskertkish tehnıkalyq sıpattamaǵa sáıkes OCS 545 markaly qoladan jasalǵan. Tuǵyrdyń bıiktigi 165 sm, al fıgýralar onyń ajyramas bóligi bolyp tabylatyn podıýmdy qosqanda 400 sm.
Bastapqy krıterııler boıynsha daıyndalǵan tuǵyr komısıanyń sheshimimen qysqarǵannan keıin qalǵan materıal (tas) odan ári paıdalanýǵa jaramsyz bolyp shyqty jáne áli kúnge deıin «Aspantau Construstion» JSHS aýmaǵynda saqtaýly.
«Almaty qalasynyń mádenıet basqarmasy búgin eskertkishti baqylaý ólsheýin júrgizip, ǵımarat avtorlary kórsetken parametrlerdi rastady».
Eske salaıyq, byltyrǵy 30 jeltoqsanda Almaty qalasynda kórnekti aǵartýshy-pedagog, jazýshy, etnograf, qoǵam qaıratkeri Y. Altynsarınge eskertkish ornatylǵan bolatyn.