Zań jobasy Májilis depýtattaryna tanystyryldy
Qazaqstanda alqabıler sotynyń ókileti keńeıedi, dep habarlaıdy Almaty-akshamy.kz Almaty.tv-ge silteme jasap.
Iaǵnı azaptaý, reıderlik, zańsyz ań aýlaý syndy baptar boıynsha sottalǵandar endi alqabıler sotyna júgine alady. Búgin osyndaı zań jobasy Májilis depýtattaryna tanystyryldy. Al isi asa qupıa tergelip jatqan Kárim Másimovtyń sotyna alqabıler qatyspaıdy.
Búgingi Májilis otyrysy «ArselorMıttal Temirtaýda» qaza tapqandardy bir mınýttyq únsizdikpen eske alýmen bastaldy. Artynsha Joǵarǵy sottyń qylmystyq ister jónindegi sot alqasynyń tóraǵasy Ábdirashıt Júkenov alqabılerdiń ókilettigin keńeıtetin Zańdy tanystyrdy. Zań jobasynda kelesi jyldan bastap alqabıler sotyna taǵy 13 aýyr jáne onsha aýyr emes qylmys quramyn berý usynylyp otyr. Olardyń arasynda reıderlik, azaptaý, zańsyz ań aýlaý, kólikti mas kúıde basqaryp, adam ólimine ákep soǵý syndy ister bar. Joǵarǵy sot ókiliniń aıtýynsha, zań jobasyn qabyldaý sottardyń qyzmetin jetildirýge, olarǵa degen senim deńgeıin arttyrýǵa septesedi.
«Jalpy alǵanda alqabıler sotynyń sottyǵyna 44 zań jatatyn bolady. Qurmetti depýtattar, alqabıler sotynyń sottylyǵy sot júıesin demokratızasıalaýǵa yqpal etetin jáne qoǵam tarapynan sotqa degen senimdi edáýir arttyratyn bolady», – dedi Joǵarǵy sottyń qylmystyq ister jónindegi sot alqasynyń tóraǵasy Ábdirashıt Júkenov.
Osylaısha Ábdirashıt Júkenov depýtattardan zań jobasyn qoldaýdy surady. Baıandamasy aıaqtala salysymen zalda otyrǵandar suraǵyn jaýdyra bastady. Edil Jańbyrshın «óńir-óńirden ádildik izdep kelgen aǵaıyn sottarmen jolyǵa almaı ketedi» dep syn aıtty. Tipti, shydamy taýsylǵan keıbir azamattardyń ózderin órtep jibergen oqıǵany eske alyp, sottyń ashyqtyǵyn talap etti.
«Sot júıesi, mekemesi bir jabyq mekemege aınalyp ketken. Al Prezıdent aıtyp jatyr, Úkimet, ashyq bolýy kerek. Barlyq bılik halyqpen jumys jasaýy kerek. Estý kerek deıdi. Al sizderden biz ony kórip otyrǵan joqpyz. Sondyqtan biz ne jergilikti jerde bárin retteýimiz kerek, ne sizder osy jerde kelgen halyqpen durystap kezdesýlerińiz kerek, apparattyń qyzmetkerleri emes», – dedi QR Parlamenti Májilisiniń depýtaty Edil Jańbyrshın.
Depýtattyń suraǵy tosynnan boldy ma, áıteýir Joǵarǵy sot ókili bul saýalǵa qysqa ǵana «tek zań aıasynda isterdi qaraımyz» dep jaýap berdi. Alaıda, qatyp qalǵan qaǵıda joq degen Edil Jańbyrshın muńyn aıtyp kelgen halyqpen sottar da kezdesýdiń jolyn qarastyrý keregin basa aıtty.