Qazaq sarbazdary "Rýbej-2022" birlesken oqý-jattyǵýyna qatysyp jatyr
Ortalyq Azıa óńiriniń ujymdyq jedel óristetý kúshteriniń "Rýbej-2022" birlesken oqý-jattyǵýyna qatysýshylar 1995 jyly Tájikstanda qaza tapqan qazaqstandyq áskerı qyzmetshilerdiń eskertkishine gúl shoqtaryn qoıdy, dep habarlaıdy Almaty-akshamy.kz.
Dýshanbe qalasynyń "Dostyq" saıabaǵynda ótken rásimge Tájikstan Respýblıkasyndaǵy áskerı attashe general-maıor Asqar Mustabekov, "Astana" óńirlik qolbasshylyǵy áskerleri qolbasshysynyń birinshi orynbasary polkovnık Baǵlan Óserbaev jáne qazaqstandyq desantshylar qatysty. Olar qaza tapqan áskerı qyzmetshilerdi bir mınýt únsizdikpen eske alyp, bozdaqtardyń rýhyna taǵzym etti.
– Biz TMD-nyń ońtústik shekarasyn qorǵaýda ólimge qasqaıyp qarsy tura bilgen jerlesterimizge basymyzdy ıemiz, - dedi oqý-jattyǵýǵa qatysýshy maıor Samat Qapanov.
1995 jyly sáýirde Pshıhavr shatqalyndaǵy tájik-aýǵan shekarasynda Qazaqstannyń bitimgerlik rotasy sodyrlardyń tutqıyldan jasaǵan shabýylyna tap boldy. Eki jaqtyń kúshi teń emes edi. Bizdiń jaýyngerler áskerı antqa adaldyq tanytyp, jan aıamaı arpalysty. Sol urysta 17 áskerı qyzmetshimiz qaza tapty. Olardyń esimi halyqtyń jadynda máńgi saqtalady.
Bul kúnderi "Harbmaıdon" polıgonynda Ortalyq Azıa óńiriniń jedel óristetý ujymdyq kúshteriniń "Rýbej-2022" birlesken oqý-jattyǵýlary ótip jatqanyn esterińizge salamyz. Oǵan Qazaqstan Qarýly kúshteri Desanttyq-shabýyldaý áskerleriniń áskerı qyzmetshileri qatysady.