Naýqastarǵa operasıa mindetti áleýmettik-medısınalyq saqtandyrý arqyly tegin jasaldy
Júrek qan-tamyr aýrýlary bar naýqastarǵa erekshe stent qoıyldy. Onyń ózgelerden ereksheligi qurylǵy dárimen qaptalǵan. Mundaı operasıany Almatydaǵy Kardıologıa jáne ishki aýrýlar ǵylymı-zertteý ınstıtýtynyń dárigerleri avstrıalyq ıntervensıalyq kardıolog Aýrel Tomanyń jetekshiligimen jasap jatyr. Búgin óńirlerden kelgen medısına qyzmetkerleri bilikti mamannyń sheberlik sabaǵyna qatysyp, keńes aldy, dep habarlaıdy Almaty-akshamy.kz «Habar 24» telearnasyna silteme jasap.
Almatylyq Yrymǵalı Imashevqa keshe ǵana operasıa jasaldy. Júrektiń eń kúrdeli sanalatyn bóligine stent qoıyldy. Bul qan-tamyrynyń ótkizgishtigin qamtamasyz etetin dárimen qaptalǵan. Naýqastyń ıshemıalyq júrek aýrýyna shaldyqqanyna 10 jylǵa jýyqtaǵan. Sońǵy eki jylda jaǵdaıy tipten qıyndaı túsken. Operasıanyń ashyq túrine kelispegen. Al, jergilikti mamandar men Avstrıadan kelgen ıntervensıalyq kardıolog Aýrel Toma endovaskýlárlyq ádispen jasady.
«Operasıa bári jaqsy ótti. Eshqandaı jerim aýyrǵan joq. Basym da aýyrǵan joq. Bárin sezip jattym. Gde to 4 saǵat jasady. 2-3 kúnnen keıin sezinetin shyǵarmyn. Bári jaqsy bolady dep oılaımyn»,-deıdi qala turǵyny Yrymǵalı Imashev.
Rasynda mundaı operasıa kúrdeli sanalady. Uzaqtyǵy 5-6 saǵatqa deıin sozylýy múmin. Biraq artyqshylyǵy óte kóp. Naýqas tez qalpyna keledi. Aýrýhanadan 4-5 kúnde úıine shyǵyp ketedi. Iaǵnı, júrek qan tamyryna qatysty kúrdeli patalogıany emdeıdi. Aýrel Tomanyń aıtýynsha bul operasıa kez-kelgen jerde jasala bermeıdi.
«Mundaı operasıany jasaý úshin mamandardyń kásibı biliktiligi joǵary bolýy tıis. Munyń ádis-tásilderin jaqsylap meńgerý úshin álem boıynsha kem degende 3-4, tipti 5 jyl kerek shyǵar dep oılaımyn. Stent koronarlyq arterıanyń qalypty jumys isteýine múmkindik beredi. Birneshe operasıa jasadyq Barlyǵy da sátti ótti», -dedi Avstrıadan kelgen ıntervensıalyq kardıolog Aýrel Toma.
Naýqastarǵa operasıa mindetti áleýmettik-medısınalyq saqtandyrý arqyly tegin jasaldy. Aqyly bolǵan jaǵdaıda onyń quny bir jarym mıllıon teńgege jýyqtaıdy, deıdi mamandar.
«Dárigerler óte jaqsy tájirıbe almasyp jatyr. Kózbe-kóz tildesip, birge jumys istegenniń bereri kóp. Onyń ústine qazir medısına óte tez damý ústinde. Aýrel Toma koronarlyq arterıany stentteý boıynsha birneshe kórneki operasıa júrgizip kórsetip berdi», - dedi medısına ǵylymdarynyń doktory Roza Qýanyshbekova.
Ókinishke oraı, elimizde sozylmaly juqpaly emes aýrýlardyń 40 prosenti júrek pen qan tamyrlarynyń jumysymen baılanysty. Dese de sala jedel damyp jatyr. Endi dál osyndaı ádisti Almatydan ózge Astana, Semeı, Taraz qalalarynyń kardıologtary da meńgerip qaıtady.